کمند حلقۂ گفتار توڑ دی میں نے

 کمندِ حلقۂ گُفتار توڑ دی میں نے

کہ مہرِ دستِ قلمکار توڑ دی میں نے

روایتوں کو صلیبوں سے کر دیا آزاد

یہی رسن تو سرِ دار توڑ دی میں نے

یہ میرے ہاتھ ہیں اور بے شناخت اب بھی نہیں

یہ اور بات ہے، تلوار توڑ دی میں نے

ذہن زندہ ہے مگر اپنے سوالات کے ساتھ

 ذہن زندہ ہے مگر اپنے سوالات کے ساتھ

کتنے الجھاؤ ہیں زنجیر روایات کے ساتھ

کون دیکھے گا یہاں دن کے اجالوں کا ستم

یہ ستارے تو چلے جائیں گے سب رات کے ساتھ

جانے کس موڑ پہ منزل کا پتہ بھول گئے

ہم کہ چلتے ہی رہے گردش حالات کے ساتھ

سربلندی تو صلیبوں کا مقدر ہے یہاں

سر بلندی تو صلیبوں کا مقدر ہے یہاں

دیکھ لو سامنے محراب ہے منبر ہے یہاں

جس کی تقدیر میں ٹوٹا ہوا آئینہ ہو

اس سے کیا کہیۓ کہ کون سکندر ہے یہاں

کوئی کانٹوں کا بھی دیتا ہے کسی کو تحفہ؟

دل میں رکھنے کا تو احساس کا نشتر ہے یہاں

عجیب شخص ہے پتھر سے پر بناتا ہے

عجیب شخص ہے پتھر سے پر بناتا ہے

دیارِ سنگ میں شیشہ کا گھر بناتا ہے

فضا کا بوجھ سمجھتا ہے چاند سورج کا

وہ گردنوں پہ سجانے کو سر بناتا ہے

جہاں سے قافلۂ وقت راہ بھولا تھا

انہیں سرابوں میں وہ رہگزر بناتا ہے

ذہن زندہ ہے مگر اپنے سوالات کے ساتھ

ذہن زندہ ہے مگر اپنے سوالات کے ساتھ

کتنے الجھاؤ ہیں زنجیرِ روایات کے ساتھ

کون دیکھے گا یہاں دن کے اجالوں کا ستم

یہ ستارے تو چلے جائینگے سب رات کے ساتھ

جانے کس موڑ پہ منزل کا پتہ بھول گئے؟؟

ہم کہ چلتے ہی رہے گردشِ حالات کے ساتھ

وہی جو راہ کا پتھر تھا بے تراش بھی تھا

وہی جو راہ کا پتھر تھا، بے تراش بھی تھا 

وہ خستہ جاں ہی کبھی آئینہ قماش بھی تھا 

لہو کے پھول رگ جاں میں جس سے کھلتے تھے 

وہی تو شیشۂ دل تھا کہ پاش پاش بھی تھا

اٹھائے پھرتا تھا جس کو صلیب کی صورت

وہی وجود تو خود اس کی زندہ لاش بھی تھا

یہ کس سے کہیے کہ خوابوں کے ساتھ گزری ہے

یہ کس سے کہئے کہ خوابوں کے ساتھ گزری ہے

یہ زندگی جو کتابوں کے ساتھ گزری ہے

نظر نے اس کو چھوا بھی تو فاصلے رکھ کر

وہ موجِ گل جو حبابوں کے ساتھ گزری ہے

یہ حوصلہ بھی کہاں، آئینہ وہ دیکھ سکیں

وہ جن کی عمر نقابوں کے ساتھ گزری ہے

منزل ملے ملے نہ ملے راستہ ملے

منزل ملے، ملے نہ ملے، راستہ ملے

اس دشتِ آرزو میں کوئی نقشِ پا ملے

جب سوچ بھی بدل گئی لفظوں کے ساتھ ساتھ

ممکن نہ تھا کہ اپنا کوئی ہمنوا ملے

یہ اور بات ہے وہ چراغِ🪔 وفا نہ ہو

شعلہ ہی کوئی اب مِرے قدموں سے آ ملے

مل بھی جاتا جو کہیں آب بقا کیا کرتے

مل بھی جاتا جو کہیں آبِ بقا، کیا کرتے
زندگی خود بھی تھی جینے کی سزا، کیا کرتے
سرحدیں وہ نہ سہی، اپنی حدوں سے باہر
جو بھی ممکن تھا کِیا، اس کے سوا کیا کرتے
ہم سرابوں میں سدا پھول کھلاتے گزرے
یہ بھی تھا آبلہ پائی کا صِلا کیا کرتے

ابھی تو آنکھ میں نادیدہ خواب باقی ہیں

ابھی تو آنکھ میں نادیدہ خواب باقی ہیں
جو وقت لکھ نہیں پایا، وہ باب باقی ہیں
سزا جو اگلے صحیفوں میں تھی تمام ہوئی
مگر صحیفۂ دل💔 کے عذاب باقی ہیں
کرو گے جمع بھلا کیسے دل کے شیشوں کو
ابھی تو دشتِ فلک میں شہاب باقی ہیں

مشترک درد کے رشتوں میں وفا ہے بھی کہاں

مشترک درد کے رشتوں میں وفا ہے بھی کہاں
تم جسے ڈھونڈ رہے ہو بخدا ہے بھی کہاں
یا اخی" کہہ کے بھلا کون پکارے گا تمہیں"
دل کی دھڑکن کے سوا کوہِ ندا ہے بھی کہاں
کیسے اب اپنے خد و خال کو پہچانو گے
دل کے آئینہ میں پہلی سی جِلا ہے بھی کہاں

کیا ضروری ہے کوئی بے سبب آزار بھی ہو

کیا ضروری ہے کوئی بے سبب آزار بھی ہو
سنگ اپنے لیے شیشہ کا طلبگار بھی ہو
دلبری، حسن کا شیوہ ہے مگر کیا کیجئے
اب یہ لازم تو نہیں حسن وفادار بھی ہو
زخمِ جاں وقت کے کانٹوں سے بھی سِل سکتا ہے
کیا ضروری ہے کہ ریشم کا کوئی تار بھی ہو