جس موڑ پر کیے تھے ہم نے قرار برسوں

 جس موڑ پر کیے تھے ہم نے قرار برسوں

اس سے لپٹ کے روئے دیوانہ وار برسوں

تم گلسـتان سے آئے، ذکرِ خزاں ہی لائے 

ہم نے قفس میں دیکھی فصلِ بہار برسوں

ہوتی رہی ہے یوں تو، برسات آنسوؤں کی

اٹھتے رہے ہیں پھر بھی، دل سے غبار برسوں

اہل الفت کے حوالوں پہ ہنسی آتی ہے

اہلِ الفت کے حوالوں پہ ہنسی آتی ہے 

ليلیٰ مجنوں کی مثالوں پہ ہنسی آتی ہے 

جب بھی تکميلِ محبت کا خيال آتا ہے 

مجھ کو اپنے ہی خيالوں پہ ہنسی آتی ہے 

لوگ اپنے لیے اوروں ميں وفا ڈھونڈتے ہيں 

ان وفا ڈھونڈنے والوں پہ ہنسی آتی ہے 

الفت کا جب کسی نے لیا نام تو رو پڑے

الفت کا جب کسی نے لیا نام تو رو پڑے

اپنی وفا کا سوچ کے انجام رو پڑے

ہر شام یہ سوال محبت سے کیا ملا

ہر شام یہ جواب کہ ہر شام رو پڑے​

راہِ وفا میں ہم کو خوشی کی تلاش تھی

دو گام ہی چلے تھے کہ ہر گام رو پڑے

اگر ہم کہیں اور وہ مسکرا دیں

اگر ہم کہیں اور وہ مسکرا دیں 

ہم ان کے لیے زندگی لٹا دیں 

ہر اک موڑ پر ہم غموں کو سزا دیں 

چلو زندگی کو محبت بنا دیں 

اگر خود کو بھولے تو کچھ بھی نہ بھولے

کہ چاہت میں ان کی خدا کو بھلا دیں

کچھ تو دنیا کی عنایت نے دل توڑ دیا

کچھ تو دنیا کی عنایت نے دل توڑ دیا 

اور کچھ تلخئ حالات نے دل توڑ دیا 

ہم تو سمجھے تھے کے برسات میں برسے گی شراب 

آئی برسات تو برسات نے دل توڑ دیا 

دل تو روتا رہے اور آنکھ سے آنسو نہ بہیں 

عشق کی ایسی روایت نے دل توڑ دیا 

شاید میں زندگی کی سحر لے کے آ گیا

شاید میں زندگی کی سحر لے کے آ گیا 

قاتل کو آج اپنے ہی گھر لے کے آ گیا  

تا عمر ڈھونڈتا رہا منزل میں عشق کی 

انجام یہ کہ گردِ سفر لے کے آ گیا 

نشتر ہے میرے ہاتھ میں کاندھوں پہ میکدہ 

لو میں علاجِ دردِ جگر لے کے آ گیا 

اس موڑ سے شروع کریں پھر یہ زندگی

اس موڑ سے شروع کریں پھر یہ زندگی

ہر شے جہاں حسِین تھی ہم تم تھے اجنبی

اس موڑ سے شروع کریں پھر یہ زندگی

ہر شے جہاں حسِین تھی ہم تم تھے اجنبی

لے کر چلے تھے ہم جنہیں جنت کے خواب تھے

پھولوں کے خواب تھے وہ محبت کے خواب تھے

لیکن کہاں ان میں وہ پہلی سی دلکشی

پتھر کے خدا پتھر کے صنم پتھر کے ہی انساں پائے ہیں

پتھر کے خدا پتھر کے صنم پتھر کے ہی انساں پائے ہیں

تم شہرِ محبت کہتے ہو، ہم جان بچا کر آئے ہیں

بت خانہ سمجھتے ہو جس کو، پوچھو نہ وہاں کیا حالت ہے 

ہم لوگ وہیں سے لوٹے ہیں، بس شکر کرو لوٹ آئے ہیں

ہم سوچ رہے ہیں مدت سے، اب عمر گزاریں بھی تو کہاں

صحرا میں خوشی کے پھول نہیں، شہروں میں غموں کے سائے ہیں

غم بڑھے آتے ہیں قاتل کی نگاہوں کی طرح

غم بڑھے آتے ہیں قاتل کی نگاہوں کی طرح

تم چھپا لو مجھے اے دوست گناہوں کی طرح

اپنی نظروں میں گنہ گار نہ ہوتے کیوں کر

دل ہی دشمن ہے مخالف کے گواہوں کی طرح

ہر طرف زیست کی راہوں میں کڑی دھوپ ہے دوست

بس تیری یاد کے سائے ہیں پناہوں کی طرح

آج کے دور میں اے دوست یہ منظر کیوں ہے

آج کے دور میں اے دوست یہ منظر کیوں ہے 

زخم ہر سر پہ، ہر ایک ہاتھ میں پتھر کیوں ہے

جب حقیقت ہے کہ ہر ذرے میں تُو رہتا ہے

پھر زمین پر کہیں مسجد، کہیں مندر کیوں ہے

اپنا انجام تو معلوم ہے سب کو، پھر بھی

اپنی نظروں میں ہر انسان سکندر کیوں ہے

دنیا سے وفا کر کے صلہ ڈھونڈ رہے ہیں

دنیا سے وفا کر کے صلہ ڈھونڈ رہے ہیں

ہم لوگ بھی ناداں ہیں یہ کیا ڈھونڈ رہے ہیں

کچھ دیر ٹھہر جائیے اے بندۂ انصاف

ہم اپنے گناہوں میں خطا ڈھونڈ رہے ہیں

یہ بھی تو سزا ہے کہ گرفتارِ وفا ہوں

کیوں لوگ محبت کی سزا ڈھونڈ رہے ہیں

کسی رنجش کو ہوا دو کہ میں زندہ ہوں ابھی

کسی رنجش کو ہوا دو کہ میں زندہ ہوں ابھی

مجھ کو احساس دلا دو کہ میں زندہ ہوں ابھی

میرے رکنے سے مِری سانسیں بھی رک جائیں گی

فاصلے اور بڑھا دو کہ میں زندہ ہوں ابھی

زہر پینے کی تو عادت تھی زمانے والو 

اب کوئی اور دوا دو کہ میں زندہ ہوں ابھی

مری زباں سے مری داستاں سنو تو سہی

مِری زباں سے مِری داستاں سنو تو سہی

یقیں کرو نہ کرو مہرباں، سنو تو سہی

چلو یہ مان لیا مجرمِ محبت ہیں

ہمارے جرم کا ہم سے بیاں سنو تو سہی

بنو گے دوست مِرے تم بھی دشمنو اک دِن

مِری حیات کی آہ و فغاں سنو تو سہی

سامنے ہے جو اسے لوگ برا کہتے ہیں

سامنے ہے جو اسے لوگ برا کہتے ہیں 

جس کو دیکھا ہی نہیں اس کو خدا کہتے ہیں

زندگی کو بھی صِلہ کہتے ہیں کہنے والے

جینے والوں کو گناہوں کی سزا کہتے ہیں

فاصلے عمر کے کچھ اور بڑھا دیتی ہے 

جانے کیوں لوگ اسے پھر بھی دوا کہتے ہیں

زندگی تجھ کو جیا ہے کوئی افسوس نہیں

زندگی تجھ کو جیا ہے کوئی افسوس نہیں

زہر خود میں پیا ہے، کوئی افسوس نہیں

میں نے مجرم کو بھی مجرم نہ کہا دنیا میں 

بس یہی جرم کیا ہے، کوئی افسوس نہیں

میری قسمت میں جو لکھے تھے انہی کانٹوں سے

دل کے زخموں کو سیا ہے کوئی افسوس نہیں

فلسفے عشق میں پیش آئے سوالوں کی طرح

فلسفے عشق میں پیش آئے سوالوں کی طرح 

ہم پریشاں ہی رہے اپنے خیالوں کی طرح

شیشہ گر بیٹھے رہے ذکرِ مسیحا لے کر 

اور ہم ٹوٹ گئے کانچ کے پیالوں کی طرح

جب بھی انجامِ محبت نے پکارا خود کو 

وقت نے پیش کیا ہم کو مثالوں کی طرح

میرے دکھ کی کوئی دوا نہ کرو

میرے دکھ کی کوئی دوا نہ کرو 

مجھ کو مجھ سے ابھی جدا نہ کرو

ناخدا کو خدا کہا ہے تو پھر 

ڈوب جاؤ، خدا خدا نہ کرو

یہ سکھایا ہے دوستی نے ہمیں 

دوست بن کر کبھی وفا نہ کرو

کچھ تو دنیا کی عنایات نے دل توڑ دیا

کچھ تو دنیا کی عنایات نے دل توڑ دیا

اور کچھ تلخئ حالات نے دل توڑ دیا

ہم تو سمجھے تھے کہ برسات میں برسے گی شراب

آئی برسات تو برسات نے دل توڑ دیا

دل تو روتا رہے اور آنکھ سے آنسو نہ بہے

عشق کی ایسی روایات نے دل توڑ دیا

عشق میں غیرت جذبات نے رونے نہ دیا

عشق میں غیرتِ جذبات نے رونے نہ دیا

ورنہ کیا بات تھی کس بات نے رونے نہ دیا

آپ کہتے تھے کہ رونے سے نہ بدلیں گے نصیب

عمر بھر آپ کی اس بات نے رونے نہ دیا

رونے والوں سے کہو ان کا بھی رونا رو لیں

جن کو مجبورئ حالات نے رونے نہ دیا

دل کی دیوار و در پہ کیا دیکھا

دل کی دیوار و در پہ کیا دیکھا

بس تِرا نام ہی لکھا دیکھا

تیری آنکھوں میں ہم نے کیا دیکھا

کبھی قاتل، کبھی خدا دیکھا

اپنی صورت لگی پرائی سی

جب کبھی ہم نے آئینہ دیکھا