دل جب خالی ہو جاتا ہے

 دل جب خالی ہو جاتا ہے

اور بھی بھاری ہو جاتا ہے

جب تو ساقی ہو جاتا ہے

عشق شرابی ہو جاتا ہے

میں جب تک کچھ طے کرتا ہوں

سب کچھ ماضی ہو جاتا ہے

دست ضروریات میں بٹتا چلا گیا

 دستِ ضروریات میں بٹتا چلا گیا

میں بے پناہ شخص تھا گھٹتا چلا گیا

پیچھے ہٹا میں راستہ دینے کے واسطے

پھر یوں ہوا کہ راہ سے ہٹتا چلا گیا

عجلت تھی اس قدر کہ میں کچھ بھی پڑھے بغیر

اوراق زندگی کے پلٹتا چلا گیا

آج کی رات دل پہ بھاری ہے

ایک مہماں کا ہجر طاری ہے

میزبانی کی مشق جاری ہے

صرف ہلکی سی بے قراری ہے

آج کی رات دل پہ بھاری ہے

کوئی پنچھی کوئی شکاری ہے

زندہ رہنے کی جنگ جاری ہے

نہیں ہو تم تو ایسا لگ رہا ہے

نہیں ہو تم تو ایسا لگ رہا ہے

کہ جیسے شہر میں کرفیو لگا ہے

مِرے سائے میں اس کا نقش پا ہے

بڑا احسان مجھ پر دھوپ کا ہے

کوئی برباد ہو کر جا چکا ہے 

کوئی برباد ہونا چاہتا ہے

بچھڑتے وقت رونا چاہیے تھا

ذرا محتاط ہونا چاہیے تھا

بغیر اشکوں کے رونا چاہیے تھا

اب ان کو یاد کر کے رو رہے ہیں

بچھڑتے وقت رونا چاہیے تھا

مِری وعدہ خلافی پر وہ چپ ہے

اسے ناراض ہونا چاہیے تھا

نمک کی روز مالش کر رہے ہیں

نمک کی روز مالش کر رہے ہیں

ہمارے زخم ورزش کر رہے ہیں

سنو لوگوں کو یہ شک ہو گیا ہے

کہ ہم جینے کی سازش کر رہے ہیں

ہماری پیاس کو "رانی" بنا لیں

کئی "دریا" یہ کوشش کر رہے ہیں

سہارے جانے پہچانے بنا لوں

سہارے جانے پہچانے بنا لوں

ستونوں پر تِرے شانے بنا لوں

اجازت ہو تو اپنی شاعری سے

تِرے دو چار دیوانے بنا لوں

تِرا سایہ پڑا تھا جس جگہ پر

میں اس کے نیچے تہہ خانے بنا لوں

پوچھ لیتے وہ بس مزاج مرا

پوچھ لیتے وہ بس مزاج مِرا

کتنا آسان تھا علاج مرا

چارہ گر کی نظر بتاتی ہے

حال اچھا نہیں ہے آج مرا

میں تو رہتا ہوں دشت میں مصروف

قیس کرتا ہے کام کاج مرا

جاہلوں کو سلام کرنا ہے

جاہلوں کو سلام کرنا ہے

اور پھر جھوٹ موٹ ڈرنا ہے

کاش وہ راستے میں مل جائے

مجھ کو منہ پھیر کر گزرنا ہے

پوچھتی ہے صدائے بال و پر

کیا زمیں پر نہیں اترنا ہے؟

تیرے جیسا کوئی ملا ہی نہیں

تیرے جیسا کوئی ملا ہی نہیں

کیسے ملتا، کہیں پہ تھا ہی نہیں

گھر کے ملبے سے گھر بنا ہی نہیں

زلزلے کا "اثر" گیا ہی نہیں

مجھ پہ ہو کر گزر گئی دنیا

میں تِری راہ سے ہٹا ہی نہیں

کوئی ملتا نہیں خدا کی طرح

کوئی ملتا نہیں خدا کی طرح

پھرتا رہتا ہوں میں دعا کی طرح

غم تعاقب میں ہیں سزا کی طرح

تُو چھپا لے مجھے خطا کی طرح

ہے مریضوں میں تذکرہ میرا

آزمائی ہوئی 'دوا' کی طرح

خواب میں اک حسیں دکھائی دیا

خواب میں اک حسیں دکھائی دیا

وہ بھی پردہ نشیں دکھائی دیا

وہ کہیں تھا کہیں دکھائی دیا

میں جہاں تھا وہیں دکھائی دیا

جب تلک تُو نہیں دکھائی دیا

گھر کہیں کا کہیں دکھائی دیا

ولولے جب ہوا کے بیٹھ گئے

ولولے جب ہوا کے بیٹھ گئے

ہم بھی شمعیں بجھا کے بیٹھ گئے

وقت آیا جو تیر کھانے کا

مشورے دور جا کے بیٹھ گئے

عید کے روز ہم پھٹی چادر

پچھلی صف میں بچھا کے بیٹھ گئے