یہ دل تو کسی طرح سے اے یار نہ ٹوٹے

 اس جور و جفا سے ترے زنہار نہ ٹوٹے

یہ دل تو کسی طرح سے اے یار نہ ٹوٹے

غیروں کو نہ کر مجھ دل بسمل کے مقابل

چو رنگ لگاتے تری تلوار نہ ٹوٹے

وہ شیشۂ دل ہے کہ اسی سنگ جفا پر

سو بار اگر پھینکئے یک بار نہ ٹوٹے

دیکھئے خاک میں مجنوں کی اثر ہے کہ نہیں

دیکھیے خاک میں مجنوں کی اثر ہے کہ نہیں

دشت میں ناقۂ لیلیٰ کا گزر ہے کہ نہیں

وا اگر چشم نہ ہو اس کو نہ کہنا پی اشک

یہ خدا جانے، صدف بیچ گہر ہے کہ نہیں

ایک نے مجھ کو تِرے در کے اُپر دیکھ کہا

غیر اس در کے تجھے اور بھی در ہے کہ نہیں

حیف دل میں ترے وفا نہ ہوئی

حیف دل میں تِرے وفا نہ ہوئی

کیوں تِری چشم میں حیا نہ ہوئی

یار نے نامہ بر سے خط نہ لیا

میری خاطر عزیز! کیا نہ ہوئی

رہ گیا دور تیرے کوچہ سے

خاک بھی میری پیش پا نہ ہوئی

ہرگز مرا وحشی نہ ہوا رام کسی کا

ہرگز مِرا وحشی نہ ہوا رام کسی کا

وہ صبح کو ہے یار مِرا، شام کسی کا

اس ہستئ موہوم میں ہرگز نہ کھلی چشم

معلوم کسی کو نہیں انجام کسی کا

اتنا کوئی کہہ دے کہ مِرا یار کہاں ہے

باللہ میں لینے کا نہیں نام کسی کا

اٹھ چکا دل مرا زمانے سے

اٹھ چکا دل مِرا زمانے سے

اڑ گیا مرغ آشیانے سے

دیکھ کر دل کو مڑ گئی مژگاں

تیر خالی پڑا نشانے سے

چشم کو نقشِ پا کروں کیونکر

دور ہو خاک آستانے سے

صنم بنا تو خدائی کا مجھ کو کیا نہ ہوا

صنم بنا تو خدائی کا مجھ کو کیا نہ ہوا

ہزار شکر کہ تُو بُت ہوا خدا نہ ہوا

کباب ہو گیا آخر کو کچھ بُرا نہ ہوا

عجب یہ دل ہے جلا تو بھی بے مزہ نہ ہوا

شگفتگی سے ہے غنچہ کے تئیں پریشانی

بھلا ہوا کبھی کافر تو مجھ سے وا نہ ہوا

خون آنکھوں سے نکلتا ہی رہا

خون آنکھوں سے نکلتا ہی رہا

کاروانِ اشک چلتا ہی رہا

اس کفِ پا پر تِرے رنگِ حنا

جن نے دیکھا ہاتھ مَلتا ہی رہا

صبح ہوتے بجھ گئے سارے چراغ

داغِ دل تا شام جلتا ہی رہا

اے تجلی کیا ہوا شیوہ تری تکرار کا

اے تجلی! کیا ہوا شیوہ تِری تکرار کا

مر گیا آخر کو یہ طالب تِرے دیدار کا

کیا بِنائے خانۂ عشاق بے بنیاد ہے

ڈھل گیا سر سے مِرے سایہ تِری دیوار کا

روز بہ ہوتا نظر آتا نہیں یہ زخمِ دل

دیکھیے کیا ہو خدا حافظ ہے اس بیمار کا

خط دیجیو چھپا کے ملے وہ اگر کہیں

خط دیجیو چھپا کے ملے وہ اگر کہیں

لینا نہ میرے نام کو اے نامہ بر! کہیں

بادِ صبا توں عقدہ کشا اس کی ہو جیو

مجھ سا گرفتہ دل اگر آوے نظر کہیں

اتنا وفور خوش نہیں آتا ہے اشک کا

عالم کو مت ڈبوئیو اے چشمِ تر! کہیں

عالم میں اگر عشق کا بازار نہ ہوتا

عالم میں اگر عشق کا بازار نہ ہوتا

کوئی کسی بندہ کا خریدار نہ ہوتا

ہستی کی خرابی نظر آتی جو عدم میں

اس خواب سے ہرگز کوئی بیدار نہ ہوتا

کہتا ہے تجھے خاک نہ دوں غیر اذیت

یہ دل میں اگر تھی تو مِرا یار نہ ہوتا

مفت سودا ہے ارے یار کہاں جاتا ہے

مفت سودا ہے ارے یار کہاں جاتا ہے

آ مِرے دل کے خریدار کہاں جاتا ہے

کجکلہ تیغ بکف چین برابر و بے باک

یا الٰہی! یہ ستم گار کہاں جاتا ہے

لیے جاتی ہے اجل جانِ فغاںؔ کو اے یار

لیجیو تیرا گرفتار کہاں جاتا ہے

مبتلائے عشق کو اے ہمدماں شادی کہاں

مبتلائے عشق کو اے ہم دماں شادی کہاں

آ گئے اب تو گرفتاری میں، آزادی کہاں

کوہ میں مسکن کبھی ہے اور کبھی صحرا کے بیچ

خانۂ الفت ہو ویراں،۔۔ ہم کو آبادی کہاں 

ایک میں تو قتل سے خوش ہوں ولیکن مجھ سوا

پیش جاوے گی مِرے قاتل یہ جلادی کہاں

اگر عاشق کوئی پیدا نہ ہوتا

اگر عاشق کوئی پیدا نہ ہوتا

تو معشوقوں کا یہ چرچا نہ ہوتا

گریباں چاک کر روتے کہاں ہم

اگر یہ دامنِ صحرا نہ ہوتا 

سدا رہتی توقع بلبلوں کو

اگر یہ غنچۂ گُل وا نہ ہوتا

کھا پیچ و تاب مجھ کو ڈسیں اب وہ کالیاں

کھا پیچ و تاب مجھ کو ڈسیں اب وہ کالیاں

ظالم اسی لیے تیں نے زلفیں تھیں پالیاں

تنہا نہ در کو دیکھ کے گرتے ہیں اشکِ چشم

سوراخ دل میں کرتی ہیں کانوں کی بالیاں

دیکھا کہ یہ تو چھوڑنا ممکن نہیں مجھے

چلنے لگا وہ شوخ مِرا تب یہ چالیاں