اے تجلی کیا ہوا شیوہ تری تکرار کا

اے تجلی! کیا ہوا شیوہ تِری تکرار کا

مر گیا آخر کو یہ طالب تِرے دیدار کا

کیا بِنائے خانۂ عشاق بے بنیاد ہے

ڈھل گیا سر سے مِرے سایہ تِری دیوار کا

روز بہ ہوتا نظر آتا نہیں یہ زخمِ دل

دیکھیے کیا ہو خدا حافظ ہے اس بیمار کا

نو ملازم لعل لب کو لے گئے تنخواہ میں

بے طلب رہتا ہے یہ نوکر تِری سرکار کا

دیکھ نئیں سکتا فغاںؔ شادی دل آفت طلب

یہ کہاں سے ہو گیا مالک مِرے گھر بار کا 

اشرف علی فغاں