کب میں ڈوبا تھا ترے غم میں ذرا یاد نہیں

کب میں ڈوبا تھا تِرے غم میں ذرا یاد نہیں

دن فراموش ہوئے عہدِ وفا یاد نہیں

رزم میں ٹوٹتی تلوار تو یاد آتی ہے

تیرا چہرہ ہو سراپا کہ ادا، یاد نہیں

اس خرابے میں کئی آشنا رہتے تھے مِرے

نام، چہرہ تو کجا صوت و صدا یاد نہیں

نام کیا دوں میں تِری سادی دلی کو اے دل

تجھ کو سب یاد رہا، اور خدا یاد نہیں

ہے دلآویز کہانی مِری ماضی کی بہت

کس کو اپنایا، کسے چھوڑ دیا، یاد نہیں

جمال اویسی