دور کرنے کو تری زلف کا خم اتریں گے

 دور کرنے کو تِری زلف کا خم اتریں گے 

آسمانوں کے ستارے کوئی دم اتریں گے

حوصلہ اور ذرا حوصلہ اے سنگ بدست 

وقت آئے گا تو خود شاخ سے ہم اتریں گے

ایک امید پہ تعمیر کیا ہے گھر کو 

اس کے آنگن میں کبھی تیرے قدم اتریں گے

آنکھ سے خواب لے گیا اور وہ اشک بھر گیا

 آنکھ سے خواب لے گیا اور وہ اشک بھر گیا

عشق تھا یا خمار تھا وقت کے ساتھ اتر گیا

خوشبو کو تازگی ملی، رنگوں کو روشنی ملی

آئی بہار تو ہر ایک پھول سنور سنور گیا

شام ہوئی تو اس کی یاد روح میں جلوہ گر ہوئی

ہم ہوئے در بدر تو کیا کوئی تو اپنے گھر گیا

پوری ہوئی جو ہجر کی میعاد آوے گا

پوری ہوئی جو ہجر کی میعاد آوے گا

قیدِ انا سے ہو کے وہ آزاد آوے گا

اس بت سے جی لگا نہ لگا کیا مجھے ولے

پھر کیا کرے گا جب وہ تجھے یاد آوے گا

میں تو کروں ہوں عمر بھر اک دشت کا سفر

یا ہو گا جب وہ قریۂ آباد آوے گا

کچھ اس طرح وہ دعا و سلام کر کے گیا

کچھ اس طرح وہ دعا و سلام کر کے گیا 

مِری طرف ہی رخ انتقام کر کے گیا 

جہاں میں آیا تھا انساں محبتیں کرنے 

جو کام کرنا نہیں تھا وہ کام کر کے گیا 

اسیر ہوتے گئے بادلِ ناخواستہ لوگ 

غلام کرنا تھا اس نے، غلام کر کے گیا

مری سرشت میں دھوکا نہیں محبت ہے

ثبوتِ عشق، جمالِ یقیں محبت ہے

مِری سرشت میں دھوکا نہیں، محبت ہے

گلِ خلوص مہکتا ہے میری صورت میں

مِرا مزاج، مِری سرزمیں محبت ہے

سب اپنی رائے کا اظہار کر رہے ہیں یہاں

مِرے خیال میں سب سے حسیں محبت ہے

جو زندگی تھی اسی زندگی نے قتل کیا

ہمیں خوشی کی تڑپ تھی، خوشی نے قتل کِیا

جو زندگی تھی اسی زندگی نے قتل کیا

ضرور آدم و حوا کو رنج ہوتا ہے

جب آدمی کو کسی آدمی نے قتل کیا

ہزار خواہشِ اظہارِ عشق ادھوری رہی

گلِ سخن کو مِرے اجنبی نے قتل کیا

میں ہوں صاف گو کسی پیش و پس میں نہ آؤں گا

میں ہوں صاف گو کسی پیش و پس میں نہ آؤں گا

تِرا وہم ہے، تِری دسترس میں نہ آؤں گا

مجھے روک لو،۔ میں چلا گیا، تو چلا گیا

کسی طور پھر میں تمہارے بس میں نہ آؤں گا

اسے کھینچ لایا پھر ایک دانۂ رزق ہی

وہ جو کہہ رہا تھا کہ میں قفس میں نہ آؤں گا

آب میں ذائقۂ شیر نہیں ہو سکتا

آب میں ذائقۂ شِیر نہیں ہو سکتا 

خواب تو خواب ہے تعبیر نہیں ہو سکتا 

مجھ کو پابندِ سلاسل کوئی جتنا کر لے 

پر مِرا عزم تو زنجیر نہیں ہو سکتا

ہر طرف غُل ہے شہنشاہ کی مرضی کے بغیر

اب کوئی لفظ بھی تحریر نہیں ہو سکتا

مستقل درد کی پوشاک پہن کر آئے

مستقل درد کی پوشاک پہن کر آئے
کوچۂ یار سے ہم خاک پہن کر آئے
اب یہ گستاخ نگاہوں سے شکایت کیسی
پیرہن آپ ہی بے باک پہن کر آئے
دل جو ٹکڑوں میں بٹا ہے تو عجب کیا اس میں
ہم لبادہ بھی تو صد چاک پہن کر آئے

سچ ہے عالی جناب ہوتا نہیں

سچ ہے عالی جناب ہوتا نہیں
دوستوں میں حساب ہوتا نہیں
جس کا ہر ایک پَل سہانا ہو
زندگی کوئی خواب ہوتا نہیں
جو حقیقت ہو صاف کہتا ہوں
مجھ سے پاسِ حجاب ہوتا نہیں

دونوں کے ساتھ یہ ہوا عمر محال دی گئی

دونوں کے ساتھ یہ ہوا، عمرِ محال دی گئی
عشق کو سادگی ملی، حُسن کو چال دی گئی
پہلے سے اونچا ہو گیا، سَرو کا سَر غرور سے
سَرو کے ساتھ جب تِرے قد کی مثال دی گئی
تیری نگاہ جب پڑی، دل سے گئے ہزار لوگ
تیرا اشارہ جب ہوا، جان نکال دی گئی

کل تمہیں کوئی مصیبت بھی تو پڑ سکتی ہے

کل تمہیں کوئی مصیبت بھی تو پڑ سکتی ہے

 ہم فقیروں کی ضرورت بھی تو پڑ سکتی ہے

 اتنی عُجلت میں بچھڑنے کا ارادہ نہ کرو

 پھر ملاقات میں مدت بھی تو پڑ سکتی ہے

 آدمی زاد ہوں مجھ کو نہ فرشتہ سمجھو

 لب کشا ہونے کی ہمت بھی تو پڑ سکتی ہے