جسم کا بوجھ اٹھائے ہوئے چلتے رہیے

 جسم کا بوجھ اٹھائے ہوئے چلتے رہیے

دھوپ میں برف کی مانند پگھلتے رہیے

یہ تبسم تو ہے چہروں کی سجاوٹ کے لیے

ورنہ احساس وہ دوزخ ہے کہ جلتے رہیے

اب تھکن پاؤں کی زنجیر بنی جاتی ہے

راہ کا خوف یہ کہتا ہے; کہ چلتے رہیے

اس کی باتیں تو پھول ہوں جیسے‬

 اس کی باتیں تو پھول ہوں جیسے‬

‫باقی باتیں ببول ہوں جیسے

‫چھوٹی چھوٹی سی اس کی وہ آنکھیں‬

‫دو چنبیلی کے پھول ہوں جیسے‬

اس کا ہنس کر نظر جھکا لینا‬

‫ساری شرطیں قبول ہوں جیسے‬

بکھرے بکھرے سہمے سہمے روز و شب دیکھے گا کون

بکھرے بکھرے سہمے سہمے روز و شب دیکھے گا کون

لوگ تیرے جرم دیکھیں گے، سبب دیکھے گا کون

ہاتھ میں سونے کا کاسہ لے کے آئے ہیں فقیر

اس نمائش میں تِرا دستِ طلب دیکھے گا کون

لا! اٹھا تیشہ، چٹانوں سے کوئی چشمہ نکال

سب یہاں پیاسے ہیں تیرے خشک لب دیکھے گا کون

اسی تھکے ہوئے دستِ طلب سے مانگتے ہیں

اسی تھکے ہوئے دستِ طلب سے مانگتے ہیں

جو مانگتے نہیں رب سے، وہ سب سے مانگتے ہیں

وہ بھیک مانگتا ہے حاکموں کے لہجوں میں

ہم اپنے بچوں کا حق بھی ادب سے مانگتے ہیں

میرے خدا انہیں توفیقِ خودشناسی دے

چراغ ہو کہ اجالا جو شب سے مانگتے ہیں

اے یقینوں کے خدا شہر گماں کس کا ہے

اے یقینوں کے خدا! شہرِ گماں کس کا ہے

نور تیرا ہے چراغوں میں دھواں کس کا ہے

کیا یہ موسم تِرے قانون کے پابند نہیں؟

موسمِ گل میں یہ دستورِ خزاں کس کا ہے

راکھ کے شہر میں ایک ایک سے میں پوچھتا ہوں

یہ جو محفوظ ہے اب تک، یہ مکاں کس کا ہے

زندگی دی ہے تو جینے کا ہنر بھی دینا

زندگی دی ہے تو جینے کا ہنر بھی دینا

پاؤں بخشے ہیں تو توفیقِ سفر بھی دینا

گفتگو تُو نے سکھائی ہے کہ میں گونگا تھا

اب جو بولوں گا تو باتوں میں اثر بھی دینا

میں تو اس خانہ بدوشی میں بھی خوش ہوں لیکن

اگلی نسلیں تو نہ بھٹکیں، انہیں گھر بھی دینا

تھکی ہوئی مامتا کی قیمت لگا رہے ہیں

تھکی ہوئی مامتا کی قیمت لگا رہے ہیں

امیر بیٹے دعا کی قیمت لگا رہے ہیں

میں جن کو انگلی پکڑ کے چلنا سکھا چکا ہوں

وہ آج میرے عصا کی قیمت لگا رہے ہیں

مِری ضرورت نے فن کو نیلام کر دیا ہے

تو لوگ میری انا کی قیمت لگا رہے ہیں

چراغ اپنی تھکن کی کوئی صفائی نہ دے

چراغ اپنی تھکن کی کوئی صفائی نہ دے

وہ تیرگی ہے کہ اب خواب تک دکھائی نہ دے

بہت ستاتے ہیں رشتے جو ٹوٹ جاتے ہیں

خدا کسی کو بھی توفیقِ آشنائی نہ دے

میں ساری عمر اندھیروں میں کاٹ سکتا ہوں

میرے دِیوں کو مگر روشنی پرائی نہ دے

ہم غزل میں ترا چرچا نہیں ہونے دیتے

ہم غزل میں تِرا چرچا نہیں ہونے دیتے

تیری یادوں کو بھی رسوا نہیں ہونے دیتے​

کچھ تو ہم خود بھی نہیں چاہتے شہرت اپنی

اور کچھ لوگ بھی ایسا نہیں ہونے دیتے​

عظمتیں اپنے چراغوں کی بچانے کے لیے

ہم کسی گھر میں اجالا نہیں ہونے دیتے​

اے دشت آرزو مجھے منزل کی آس دے

اے دشتِ آرزو مجھے منزل کی آس دے

میری تھکن کو گردِ سفر کا لباس دے

پروردگار تُو نے سمندر تو دے دئیے

اب میرے خشک ہونٹوں کو صحرا کی پیاس دے

فرصت کہاں کہ ذہن مسائل سے لڑ سکیں

اس نسل کو کتاب نہ دے، اقتباس دے

بے خواب ساعتوں کا پرستار کون ہے

بے خواب ساعتوں کا پرستار کون ہے

اتنی اداس رات میں بیدار کون ہے

کس کو یہ فکر ہے کہ قبیلے کو کیا ہوا

سب اس پہ لڑ رہے ہیں کہ سردار کون ہے

دیوار پر سجا تو دیئے باغیوں کے سر

ان یہ بھی دیکھ لو کہ پسِ دیوار کون ہے

یہ دنیا عالم وحشت میں کیا کیا چھوڑ دیتی ہے

یہ دنیا عالمِ وحشت میں کیا کیا چھوڑ دیتی ہے

سمندر کی محبت میں کنارہ چھوڑ دیتی ہے

بھروسہ کیا کریں اس زندگی کا، یہ تو انساں کو

فنا کی وادیوں میں لا کے تنہا چھوڑ دیتی ہے

خدا محفوظ رکھے ایسی مجبوری سے ہم سب کو

جو مجبوری پڑوسی کا جنازہ چھوڑ دیتی ہے

ایک ٹوٹی ہوئی زنجیر کی فریاد ہیں ہم

ایک ٹوٹی ہوئی زنجیر کی فریاد ہیں ہم

اور دنیا یہ سمجھتی ہے کہ آزاد ہیں ہم

کیوں ہمیں لوگ سمجھتے ہیں یہاں پردیسی

ایک مدت سے اسی شہر میں آباد ہیں ہم

کاہے کا ترکِ وطن، کاہے کی ہجرت بابا

اسی دھرتی کی، اسی دیش کی اولاد ہیں ہم

بڑھ گیا تھا پیاس کا احساس دریا دیکھ کر

بڑھ گیا تھا پیاس کا احساس دریا دیکھ کر

ہم پلٹ آئے مگر پانی کو پیاسا دیکھ کر

ہم بھی ہیں شاید کسی بھٹکی ہوئی کشتی کے لوگ

چیخنے لگتے ہیں خوابوں میں جزیرہ دیکھ کر

جس کی جتنی حیثیت ہے اس کے نام اتنا خلوص

بھیک دیتے ہیں یہاں کے لوگ کاسا دیکھ کر

تیرے بارے میں جب سوچا نہیں تھا

تیرے بارے میں جب سوچا نہیں تھا

میں تنہا تھا، مگر اتنا نہیں تھا

تیری تصویر سے کرتا تھا باتیں

میرے کمرے میں آئینہ نہیں تھا

سمندر نے مجھے پیاسا ہی رکھا

میں جب صحرا میں تھا پیاسا نہیں تھا