سنورتی آنکھ میں کاجل نہیں ہے

 سنورتی آنکھ میں کاجل نہیں ہے

تمنّا آج کیوں چنچل نہیں ہے

اُترتے ہیں بھنور دل میں ہزاروں

لبوں پر تو کوئی ہلچل نہیں ہے

حرِیر و پرنیاں والوں سے یہ کہنا

غریبوں کے لیے آنچل نہیں ہے

صدی کیا بیسویں، اکیسویں کیا

برس گُزرے خُوشی کا پل نہیں ہے

تباہی، مُفلسی، بیماریاں بھی

ہزاروں مسئلے ہیں، حل نہیں ہے

جہاں والو! ذرا اب تو بتانا؟

جگہ ایسی جہاں مقتل نہیں ہے

بدلتی رُت سلامت ہے ہمیشہ

"یہاں جو آج ہے وہ کل نہیں ہے"

ڈاکٹر صغریٰ عالم