مدتوں سے جمی برف کے جونہی تودے پگھلنے لگے

 مُدتوں سے جمی برف کے جونہی تودے پِگھلنے لگے

گہرے نمکین پانی جہازوں کے پیندے نِگلنے لگے

میں کہیں بیٹھ کر بِیتے لمحوں کو تسبیح کرتا رہا

اور آنکھوں کی تہہ میں چُھپے رنگ پرتیں  بدلنے لگے

تیز آندھی کسی موج میں میرے آثار کو چُھو گئی

اور کسی عہد کے کتنے متروک معبد نِکلنے لگے

وہ جسم کھلتا گیا مجھ پہ التفات کے ساتھ

 وہ جسم کُھلتا گیا مجھ پہ التفات کے ساتھ

میں چُھو رہا تھا شبِ وصل احتیاط کے ساتھ

یہ اعتدال میرے جسم میں کہاں آیا

تمہیں بھی دل میں رکھا خلفشارِ ذات کے ساتھ

شمار کرنا تھا اشیائے رفتگاں کو مجھے

سو میں نے رکھی اداسی تبرّکات کے ساتھ

قبول کرتے ہوئے اجتناب کرتے ہوئے

 قبول کرتے ہوئے، اجتناب کرتے ہوئے

کوئی خلش سی رہی انتخاب کرتے ہوئے

کچھ اتنا فاصلہ تھا مجھ میں اور قافلے میں

سفر تمام ہوا ہمرکاب کرتے ہوئے

یہ کس کا نام ابھرنے لگا ہے کاغذ پر

بیاضِ عمر تیرا انتساب کرتے ہوئے

یہ پیاس بجھتی نہیں تھی چناب رکھتے تھے

 یہ پیاس بجھتی نہیں تھی، چناب رکھتے تھے

ہم اپنے دشت میں کیا کیا سراب رکھتے تھے

سمے کی رو میں بہے جا رہے ہیں ایک ہی سمت

گئے وہ دن، کہ دنوں کا حساب رکھتے تھے

جنوں کے ساتھ خرد بھی سرشت میں رکھی

سلیقہ بھی تِرے خانہ خراب رکھتے تھے

ایک تالاب ہے جو کائی سے بھر جائے گا

 ایک تالاب ہے جو کائی سے بھر جائے گا

میرا کمرہ، مری تنہائی سے بھر جائے گا

دور تک پھیلا ہوا دل کا یہ خالی منظر

دیکھتے رہئے کہ بینائی سے بھر جائے گا

پیڑ کی کھردری تہہ بیل سے چھپ جائے گی

زخم ہے، اور مسیحائی سے بھر جائے گا