رنگ اردو دنیا بھر کے نامور کلاسیک اور نوجوان اردو شعراء کے شاہکار کلام پر مبنی بلاگ🌷Rung E Urdu a blog of worldsfamous poetry of past & present era
ہم ہجر کی کالی راتوں میں جب بستر خواب پہ جاتے ہیں
ماضی کے تمام مصائب اک اک کر کے سامنے آتے ہیں
پھر مستقبل کے بھیانک چہرے پر جب نظریں پڑتی ہیں
اس ہیبت ناک تصور سے ہم ڈرتے ہیں گھبراتے ہیں
غیروں سے وہ ملتے رہتے ہیں خود جا جا کر تنہائی میں
میرا کیا ہے ذکر بھلا مِرے سائے سے بھی شرماتے ہیں
اک انقلابِ مسلسل ہے زندگی میری
اک اضطرابِ مکمل ہے خامشی میری
یہ کس مقام پہ پہنچی خود آگہی میری
کہ آج آپ نے محسوس کی کمی میری
مزاجِ حسن کو بھائی نہ بندگی میری
نیازِ عشق میں شامل رہی خودی میری
عجب بے کیف ہے راتوں کی تنہائی کئی دن سے
کسی کی یاد بھی دل میں نہیں آئی کئی دن سے
بہت مغموم ہے شانِ مسیحائی کئی دن سے
بڑھی جاتی ہے زخمِ دل کی گہرائی کئی دن سے
کلی نے بھی اڑایا تھا مذاقِ گِریۂ شبنم
پڑی ہے خاک پر خشک اور مُرجھائی کئی دن سے
وہ نام زہر کا رکھ دیں دوا تو کیا ہو گا
کہیں جو خون کو رنگِ حنا تو کیا ہو گا
چمن کی سمت چلا تو ہے کاروانِ بہار
جو راہزن ہی ہوئے رہنما تو کیا ہو گا
حریفِ سیلِ حوادث تو ہے سفینۂ قوم
جو نذرِ موج ہوا نا خدا تو کیا ہو گا
وہ نمازِ عشق ہی کیا جو سلام تک نہ پہنچے
کہ قعود سے جو گزرے تو قیام تک نہ پہنچے
وہ حیات کیا کہ جس میں نہ خوشی کے ساتھ غم ہو
وہ سحر بھی کیا سحر ہے کہ جو شام تک نہ پہنچے
تِرے مے کدے کا ساقی یہ چلن بھی کیا چلن ہے
کہ جو ہاتھ تشنہ کاموں کے بھی جام تک نہ پہنچے
