وہ نام زہر کا رکھ دیں دوا تو کیا ہو گا

 وہ نام زہر کا رکھ دیں دوا تو کیا ہو گا

کہیں جو خون کو رنگِ حنا تو کیا ہو گا

چمن کی سمت چلا تو ہے کاروانِ بہار

جو راہزن ہی ہوئے رہنما تو کیا ہو گا

حریفِ سیلِ حوادث تو ہے سفینۂ قوم

جو نذرِ موج ہوا نا خدا تو کیا ہو گا

ترس رہا ہے زمانہ سکونِ دل کے لیے

سکونِ دل نہ میسر ہوا تو کیا ہو گا

چمن کے عشق میں اہلِ وفا یہ بھول گئے

بدل گئی جو چمن کی فضا تو کیا ہو گا

گزر رہی ہیں نگاہیں حدِ تجسس سے

ملا نہ کوئی جو درد آشنا تو کیا ہو گا

ہمارا خون تھا شادابیٔ چمن کا سبب

جو یہ چمن کے نہ کام آ سکا تو کیا ہو گا

غمِ حیات سے یوں تو ہیں اشکبار آنکھیں

نظر سے خون ٹپکنے لگا تو کیا ہو گا

بیاں کروں تو سہی ان کی داستانِ ستم

وہ ہو گئے اسے سن کر خفا تو کیا ہو گا

بس اک نگاہِ کرم تک ہے زندگی کا نشاط

جو یہ بھی ٹوٹ گیا آسرا تو کیا ہو گا

ابھی ہے مہلتِ حسنِ عمل، اٹھو ذوقی

جواب دینے لگے دست و پا تو کیا ہو گا

ایوب ذوقی