جو رب سے کروں التجا بانٹتا ہوں
بوقتِ سحر بس دعا بانٹتا ہوں
سخن کے سمندر سے چنتا ہوں موتی
خوشی سے میں حمد و ثنا بانٹتا ہوں
میرے پاس اپنا تو کچھ بھی نہیں ہے
عطا کردہ رب کی عطا بانٹتا ہوں
حقارت سے دیکھو نہ کشکول خالی
جو توفیق ہو برملا بانٹتا ہوں
بہت شوق بخشا ہے خدمت کا رب نے
مٹا کر میں جھوٹی انا بانٹتا ہوں
خدایا! سکھا اب سلیقہ دعا کا
سدا میں عجب اک صدا بانٹتا ہوں
جو راضی ہے طاہر گناہگار سے بھی
اسی کا کرم ہے میں کیا بانٹتا ہوں
طاہر مسعود
No comments:
Post a Comment