مہ جبینوں کی اداؤں سے اُلجھ بیٹھا ہوں
اس کا مطلب ہے بلاؤں سے الجھ بیٹھا ہوں
بابِ تاثیر سے ناکام پلٹ آئی ہیں
اس لیے اپنی دُعاؤں سے الجھ بیٹھا ہوں
جو غریبوں کا دِیا پھُونک کے تھم جاتی ہیں
ایسی کم ظرف ہواؤں سے الجھ بیٹھا ہوں
ایک کم ظرف کی بے ربط جفا کی خاطر
شہر والوں کی وفاؤں سے الجھ بیٹھا ہوں
جو مسافر کے لیے باعثِ تسکین نہیں
ایسے اشجار کی چھاؤں سے الجھ بیٹھا ہوں
عرش والے میری توقیر سلامت رکھنا
فرش کے سارے خداؤں سے الجھ بیٹھا ہوں
ان کی دستار سے کاظم میں الجھتا کیسے
بس یہی سوچ کے پاؤں سے الجھ بیٹھا ہوں
کاظم حسین کاظم
No comments:
Post a Comment