پئے عبرت مصور نے بنائی ہیں یہ تصویریں
سروں پر تاج رکھے ہیں تو پیروں میں ہیں زنجیریں
جو ہو عزمِ مصمم تو خدا بھی ساتھ دیتا ہے
مقدر کو بھی تابندہ بنا دیتی ہیں تدبیریں
محبت سے دلوں کوجیتنے کا فن وہ کیا جانیں
ذرا سی بات پر جن کی نکل آتی ہیں شمشیریں
نہیں دُھندلا سکی ہے وقت کی رفتار بھی ان کو
جو دل پر نقش ہوتی ہیں نہیں مٹتی وہ تحریریں
کوئی اک گام چل سکتا نہیں ہے کیوں؟ ذرا سوچو
یہ کس نے ڈال دیں پیروں میں اندیکھی سی زنجیریں
خطا کس سے ہوئی؟ راہِ وفا میں کیا خبر ہمدم
مگر دُھندلا گئی ہیں یک بیک کیوں ساری تصویریں
مہ و انجم کی تابش ہو کہ رنگِ لالہ و گل ہو
انہیں سے ہوتی ہیں دلکش دلوں کی ساری تحریریں
تبسم اعظمی
No comments:
Post a Comment