جتنا پیار اسے کرتا ہوں اتنی چاہت مل جاتی ہے

 جتنا پیار اسے کرتا ہوں، اتنی چاہت مل جاتی ہے

میں نے فائدہ کیا کرنا ہے، مجھ کو لاگت مل جاتی ہے

عشق اگر ہمسائے میں ہو جائے تو یہ فائدہ ہے

دل سے دل مل جاتا ہے اور چھت سے چھت مل جاتی ہے

خوف بھی آتا ہے اکثر تیری بڑھتی مشہوری سے

لوگ بدل بھی جاتے ہیں جب ان کو شہرت مل جاتی ہے

ہمیں بھی کام بہت ہے خزانے سے اس کے

 ہمیں بھی کام بہت ہے خزانے سے اس کے

ذرا یہ لوگ تو اٹھیں سرہانے سے اس کے

یہی نہ ہو کہ توجہ ہٹا لے وہ اپنی

زیادہ دیر نہ بچنا نشانے سے اس کے

وہ مجھ سے تازہ محبت پہ راضی ہے لیکن

اصول اب بھی وہی ہیں پرانے سے اس کے

بات کرتے ہوئے بے خیالی میں زلفیں کھلی چھوڑ دیں

 بات کرتے ہوئے بے خیالی میں زُلفیں کُھلی چھوڑ دیں

ہم نہتوں پہ آج اس نے کیسی بلائیں کھلی چھوڑ دیں

ساتھ جب تک رہے ایک لمحے کو بھی ربط ٹُوٹا نہیں

اٌس نے آنکھیں اگر بند کر لیں تو بانہیں کھلی چھوڑ دیں

کیا انوکھا یقیں تھا جو اُس دن اُتارا گیا شہر پر

گھر پلٹتے ہوئے تاجروں نے دُکانیں کھلی چھوڑ دیں

یہ کس مرض کی دوائیں خرید رکھی ہیں

 یہ کس مرض کی دوائیں خرید رکھی ہیں

زمین ہے نہیں، اینٹیں خرید رکھی ہیں

اگر وہ ساتھ چلے تو مجھے خوشی ہو گی

وگرنہ، میں نے تو ٹکٹیں خرید رکھی ہیں

حضور کون ہے ان نیلی آنکھوں کا مالک

حضور کس نے یہ لہریں خرید رکھی ہیں

درخت شاداب پھل رسیلے ہوا کریں گے

 درخت شاداب پھل رسیلے ہوا کریں گے 

کبھی یہ موسم بہت نشیلے ہوا کریں گے 

کبھی کبھی سر تلک پہنچ جائیں گی وہ لہریں 

کبھی کبھی صرف پاؤں گیلے ہوا کریں گے 

ہم اتنی تعداد میں لگائیں گے پیڑ پودے 

خزاں کے موسم میں صحن پیلے ہوا کریں گے

دیکھنے والی نگاہوں پہ عیاں ہوتے ہوئے

 دیکھنے والی نگاہوں پہ عیاں ہوتے ہوئے

ہم تِرے پیار کے سائے میں جواں ہوتے ہوئے

شب گزاری ہے کئی بار سڑک پر یونہی

ساتھ اک جاننے والے کا مکاں ہوتے ہوئے

ابھی آغازٍ محبت ہے ذرا حوصلہ رکھ

کبھی دیکھا نہیں دریا کو رواں ہوتے ہوئے

کسی شرط پر ترے دھیان سے نہیں جاؤں گا

 کسی شرط پر تِرے دھیان سے نہیں جاؤں گا

میں کہیں بھی اپنے مکان سے نہیں جاؤں گا

ذرا دھیان سے مِرے ذائقے کا چُناؤ کر

مجھے چکھ لیا تو زبان سے نہیں جاؤں گا

بڑے کج ادا ہیں یہ اقتدار کے راستے

مجھے لگ رہا ہے میں شان سے نہیں جاؤں گا

ہر کوئی اپنے گھر پلٹ گیا ہے

 ہر کوئی اپنے گھر پلٹ گیا ہے

مسئلہ خیر سے نمٹ گیا ہے

ہاتھ آنکھوں پہ رکھ کے چلتا ہوں

راستہ اب تو اتنا رٹ گیا ہے

وہ بھی خاموش ہو گیا میں بھی

یوں لگا جیسے فون کٹ گیا ہے

کسی طرح سنبھل نہیں رہا ہوں میں

کسی طرح سنبھل نہیں رہا ہوں میں

کہ بہہ رہا ہوں چل نہیں رہا ہوں میں

یہ سکھ بھی ہے کہ تیرے طاقچے میں ہوں

یہ دکھ بھی ہے کہ جل نہیں رہا ہوں میں

گلے لگا اے موسموں کے دیوتا

بدل مجھے، بدل نہیں رہا ہوں میں

ہم تو سمجھے تھے محبت کی لڑائی صاحب

ہم تو سمجھے تھے محبت کی لڑائی صاحب

آپ تلوار🗡اٹھا لائے ہیں بھائی صاحب

خاک کو خاک پہ دھرنے کا مزہ اپنا ہے

ہجر میں کون بچھاتا ہے چٹائی صاحب

دھوپ تالاب کا حلیہ تو بدل سکتی ہے

اتنی آسانی سے چھٹتی نہیں کائی صاحب

یوں نہ ٹھہرو کسی کے سائے میں

یوں نہ ٹھہرو کسی کے سائے میں

تم شجر ہو ہماری رائے میں

ایک دن پوچھ ہی لیا اس نے

لطف باتوں میں ہے کہ چائے میں

ایسے تھوڑی یہاں تک آئی بات

وقت گزرا ہے ہیلو ہائے میں

نتائج جب سر محشر ملیں گے

نتائج جب سرِ محشر ملیں گے

محبت کے الگ نمبر ملیں گے

یہ دیواریں کسی کی منتظر ہیں

یہاں ہر سمت کیلنڈر ملیں گے

تمہاری میزبانی کے بہانے

کوئی دن ہم بھی اپنے گھر ملیں گے

اپنا ہوتا نہ کسی چشم دگر میں رہتا

اپنا ہوتا، نہ کسی چشمِ دگر میں رہتا

اور کچھ روز جو میں تیری نظر میں رہتا

فاصلہ دیکھ ذرا رزق و محبت کے بیچ

اور خود سوچ کہ کب تک میں سفر میں رہتا

کوئی اپنوں کے علاوہ بھی نبھاتا مِرا ساتھ

کوئی لہروں کے علاوہ بھی بھنور میں رہتا

طوفان کی امید تھی آندھی نہیں آئی

طوفان کی امید تھی آندھی نہیں آئی

وہ آپ تو کیا اس کی خبر بھی نہیں آئی

کچھ آنکھوں میں تو ہو گیا آباد وہ چہرہ

کچھ بستیوں میں آج بھی بجلی نہیں آئی

ہر روز پلٹ آتے تھے مہمان کسی کے

ہر روز یہ کہتے تھے کہ گاڑی نہیں آئی

خود سے مجھے ملا کے جدا ہو گیا تو بس

خود سے مجھے ملا کے جدا ہو گیا تو بس

غفلت سے بھی اگر وہ خفا ہو گیا تو بس

پہلے ہی وہ قدیم نظر مجھ سے خوش نہیں

میں تھوڑا سا بھی اور نیا ہو گیا تو بس

دنیا کو تیرے میرے تعلق پہ ناز ہے

تُو بھی مِرے خلاف کھڑا ہو گیا تو بس

شجر پر ہی پرندے بیٹھتے ہیں

بڑی مشکل سے نیچے بیٹھتے ہیں

جو تیرے ساتھ اٹھتے بیٹھتے ہیں

اکیلے بیٹھنا ہو گا کسی کو

اگر ہم تم اکٹھے بیٹھتے ہیں

اور اب اٹھنا پڑا ناں اگلی صف سے

کہا بھی تھا کہ پیچھے بیٹھتے ہیں

کوشش کے باوجود بھی ساکن نہیں رہا

کوشش کے باوجود بھی ساکن نہیں رہا

کچھ دن میں سامنے رہا کچھ دن نہیں رہا

پہلے یہ ربط میری ضرورت بناؤ گے

اور پھر کہو گے رابطہ ممکن نہیں رہا

ہم ایک واردات سے تھوڑے ہی دور ہیں

وہ ہاتھ لگ گیا ہے، مگر چِھن نہیں رہا

دوا سے حل نہ ہوا تو دعا پہ چھوڑ دیا

دوا سے حل نہ ہوا تو دعا پہ چھوڑ دیا

ترا معاملہ ہم نے خدا پہ چھوڑ دیا

بہت خیال رکھا میرا اور درختوں کا

پھر اس نے دونوں کو آب و ہوا پہ چھوڑ دیا

میں چاہتا تھا وہی ایک دونوں جانب ہو

سو میں نے آئینہ اپنی جگہ پہ چھوڑ دیا