دن کا ملال شام کی وحشت کہاں سے لائیں

 دن کا ملال شام کی وحشت کہاں سے لائیں 

زر زادگانِ شہر محبت کہاں سے لائیں 

وہ جن کے دل کے ساتھ نہ دھڑکا ہو کوئی دل 

زندہ بھی ہیں تو اس کی شہادت کہاں سے لائیں 

دو حرف اپنے دل کی گواہی کے واسطے 

کہنا بھی چاہتے ہوں تو جرأت کہاں سے لائیں 

وہ جنگ میں نے محاذ انا پہ ہاری ہے

وہ جنگ میں نے محاذ انا پہ ہاری ہے

لہو میں آج قیامت کی برف باری ہے

مچا ہوا ہے بدن میں لہو کا واویلا

کہیں سے کوئی کمک لاؤ زہر کاری ہے

یہ دل ہے یا کسی آفت رسیدہ شہر کی رات

کہ جتنا شور تھا اتنا سکوت طاری ہے

کچھ لوگ سمجھنے ہی کو تیار نہیں تھے

 کچھ لوگ سمجھنے ہی کو تیار نہیں تھے

ہم ورنہ کوئی عقدۂ دشوار نہیں تھے

صد حیف کہ دیکھا ہے تجھے دھوپ سے بے کل

افسوس کہ ہم سایۂ دیوار نہیں تھے

ہم اتنے پریشاں تھے کہ حال دل سوزاں

ان کو بھی سنایا کہ جو غم خوار نہیں تھے

میں جب بھی قتل ہو کر دیکھتا ہوں

میں جب بھی قتل ہو کر دیکھتا ہوں 

تو اپنوں ہی کا لشکر دیکھتا ہوں 

میں دنیا اپنے اندر دیکھتا ہوں 

یہیں پہ سارا منظر دیکھتا ہوں 

مجھے اس جرم میں اندھا کیا ہے 

کہ بینائی سے بڑھ کر دیکھتا ہوں 

کم قامتان شہر برابر کے ہو گئے

آوارگانِ شوق سبھی گھر کے ہو گئے

اک ہم ہی ہیں کہ کوچۂ دلبر کے ہو گئے

پھر یوں ہوا کہ تجھ سے بچھڑنا پڑا ہمیں

پھر یوں لگا کہ شہر سمندر کے ہو گئے

کچھ دائرے تغیر دنیا کے ساتھ ساتھ

ایسے کھنچے کہ ایک ہی محور کے ہو گئے

نہ فاصلے کوئی رکھنا نہ قربتیں رکھنا

نہ فاصلے کوئی رکھنا، نہ قربتیں رکھنا

بس اب بقدرِ غزل اس سے نسبتیں رکھنا

یہ کس تعلقِ خاطر کا دے رہا ہے سراغ

کبھی کبھی تِرا مجھ سے شکایتیں رکھنا

فضائے شہر میں اب کے بڑی کدورت ہے

بہت سنبھال کے اپنی محبتیں رکھنا

خوشبو ہیں تو ہر دور کو مہکائیں گے ہم لوگ

خوشبو ہیں تو ہر دور کو مہکائیں گے ہم لوگ

مٹی ہیں تو پل بھر میں بکھر جائیں گے ہم لوگ

مہلت ہے تو جی بھر کے کرو سیر یہاں کی

پھر ایسا خرابہ بھی کہاں پائیں گے ہم لوگ

بیٹھو کہ ابھی ہے یہ گھنی چھاؤں، میسر

ڈھلتا ہوا سایہ ہیں گزر جائیں گے ہم لوگ

روز اک شخص چلا جاتا ہے خواہش کرتا

روز اک شخص چلا جاتا ہے خواہش کرتا

ابھی آ جائے گا بادل کوئی ۔۔ بارش کرتا

گھر سے نکلا تو جہاں زاد خدا اتنے تھے

میں انا زاد بھی کس کس کی پرستش کرتا

ہم تو ہر لفظ میں جاناں تِری تصویر ہوئے

اس طرح کون سا آئینہ ۔۔ ستائش کرتا

تم نغمہ ماہ ہو انجم ہو تم سوز تمنا کیا جانو

تم نغمۂ ماہ ہو، انجم ہو، تم سوزِ تمنا کیا جانو

تم دردِ محبت کیا سمجھو، تم دل کا تڑپنا کیا جانو

سو بار اگر تم روٹھ گئے، ہم تم کو منا ہی لیتے تھے

ایک بار اگر ہم روٹھ گئے ۔۔ تم ہم کو منانا کیا جانو

تخریبِ محبت آسان ہے ۔۔ تعمیرِ محبت مشکل ہے

تم آگ لگانا سیکھ گئے ۔۔ تم آگ بجھانا کیا جانو

یہ کون ڈوب گیا اور ابھر گیا مجھ میں

یہ کون ڈوب گیا اور ابھر گیا مجھ میں 

یہ کون سائے کی صورت گزر گیا مجھ میں 

یہ کس کے سوگ میں شوریدہ حال پھرتا ہوں

وہ کون شخص تھا ایسا کہ مر گیا مجھ میں 

عجب ہوائے بہاراں نے چارہ سازی کی 

وہ زخم جس کو نہ بھرنا تھا بھر گیا مجھ میں

کوئی بجھتا ہوا منظر نہیں دیکھا جاتا

کوئی بجھتا ہوا منظر نہیں دیکھا جاتا

اب کسی آنکھ کو پتھر نہیں دیکھا جاتا

وہ ہمارا نہ سہی ۔۔ اور قبیلے کا سہی

ہم سے پسپا کوئی لشکرنہیں دیکھا جاتا

کیا یہ سچ ہے کہ تِرے آئینہ خانوں میں مجھے

میرے قامت کے برابر نہیں دیکھا جاتا

اے خدا صبر دے مجھ کو نہ شکیبائی دے

اے خدا صبر دے مجھ کو، نہ شکیبائی دے

زخم وہ دے جو مِری روح کو گہرائی دے

خلقتِ شہر یونہی خوش ہے تو پھر یونہی سہی

ان کو پتھر دے، مجھے ظرفِ پزیرائی دے 

جو نگاہوں میں ہے کچھ اس سے سوا بھی دیکھوں

یا ان آنکھوں کو بجھا، یا انہیں بینائی دے

یہ نخل جاں کا ثمر تلخ عمر بھر کا ہے

یہ نخلِ جاں کا ثمر تلخ عمر بھر کا ہے

نہ پوچھ ہم سے کہ کیا ذائقہ ہنر کا ہے

ہجومِ سنگ میں بھی اس خیال سے خوش ہوں

کہ میری ذات سے اک جشن رہگزر کا ہے

جو مثلِ خاک سرِ رہگزار بیٹھے ہیں

ابھی نظر میں کوئی سانحہ سفر کا ہے

یہ کہہ رہا ہے کوئی میرے ساتھ جل جاؤ

یہ کہہ رہا ہے کوئی میرے ساتھ جل جاؤ

تم اپنے دائرۂ ذات سے نکل جاؤ

بکھیر دو مِری موجِ نفس میں نغمے سے

مِرے لہو میں کوئی گیت بن کے ڈھل جاؤ

سبھی درخت نئے برگ و بار لائے ہیں

بدل رہی ہے ہوا، تم بھی اب بدل جاؤ

ایک ہی آگ کے شعلوں میں جلائے ہوئے لوگ

ایک ہی آگ کے شعلوں میں جلائے ہوئے لوگ 

روز مِل جاتے ہیں دو چار ستائے ہوئے لوگ

وہی میں ہوں، وہی آسودہ خرامی میری

اور ہر سمت وہی دام بچھائے ہوئے لوگ

خواب کیسے کہ اب آنکھیں ہی سلامت رہ جائیں

وہ فضا ہے کہ رہیں خود کو بچائے ہوئے لوگ

میں ترے جبر بصارت کی گواہی دوں گا

میں تِرے جبرِ بصارت کی گواہی دوں گا

تُو نہ چاہے بھی تو میں تجھ کو دکھائی دوں گا

کچھ دنوں موسمِ جاں کا ہے یہی رنگ تو میں

ہر لبِ زخم کو اک تازہ نوائی دوں گا

اور پھیلوں گا جو لوٹاؤ گے آواز مِری

اتنا گونجوں گا کہ صدیوں کو سنائی دوں گا

دستک سی یہ کیا تھی کوئی سایہ ہے کہ میں ہوں

دستک سی یہ کیا تھی کوئی سایا ہے کہ میں ہوں
اک شخص مِری طرح کا آیا ہے کہ میں ہوں
سب جیسا ہوں لیکن مِرے تصویر گروں نے
چہرہ مِرا اس رُخ سے بنایا ہے کہ میں ہوں
کیا نیند تھی وہ اپنے نہ ہونے کے نشے کی
کیوں یہ مِرے ہونے نے بتایا ہے کہ میں ہوں

جانے کیا ہے جسے دیکھو وہی دلگیر لگے

جانے کیا ہے جسے دیکھو وہی دلگیر لگے
شہر کا شہر ہی اب معتقدِ میرؔ لگے
صبح آشفتہ مزاجوں کی پریشاں سخنی
رات اک مارِ سیہ جیسے عناں گیر لگے
اب تو جس آنکھ کو دیکھو وہی پتھرائی ہوئی
اب تو جس چہرے کو آواز دو، تصویر لگے

پھر جو دیکھا دور تک اک خامشی پائی گئی

پھر جو دیکھا دور تک اک خامشی پائی گئی
میں تو سمجھا تھا کہ اک میری ہی گویائی گئی
پھر وہی بادل کہ جی اڑنے کو چاہے جن کے ساتھ
پھر وہی موسم کہ جب زنجیر پہنائی گئی
پھر وہی طائر وہی ان کی غزل خوانی کے دن
پھر وہی رُت جس میں میری نغمہ پیرائی گئی

بچھڑتے وقت تو کچھ اس میں غمگساری تھی

بچھڑتے وقت تو کچھ اس میں غم گساری تھی
وہ آنکھ پھر تو ہر اک کیفیت سے عاری تھی
نہ جانے آج ہواؤں کی زد پہ کون آیا
نہ جانے آج کی شب کس دِیے کی باری تھی
ذرا سی دیر کو چمکی تو تھی غنیم کی تیغ
سوادِ شہر میں پھر روشنی ہماری تھی