چھپے گی سامنے آ کر یہ خستہ حالی کیا

 چُھپے گی سامنے آ کر یہ خستہ حالی کیا

مِلے گا شہر میں ہم کو مکان خالی کیا

چھلک پڑے جو تمہیں دیکھ کر، بتاؤ مجھے

ان آنسوؤں نے مِری آبرو بچا لی کیا؟

یہ دھڑکنیں ہیں علامت، چُھپا ہوا تو نہیں

نظر کی اوٹ میں پیکر کوئی خیالی کیا

اندر کا ہر کرب چھپاتے پھرتے ہیں

 اندر کا ہر کرب چھپاتے پھرتے ہیں

ہم دیوانے لوگ ہنساتے پھرتے ہیں

چہرہ چہرہ ہر دل کی دیوار سے ہم

اپنے نام کے حرف مٹاتے پھرتے ہیں

شاخ سے ٹوٹ کے قریہ قریہ برگِ سبز

فصلِ بہار کا حال سناتے پھرتے ہیں

پھر تقابل میں خجالت کے کھلونے آئے

 پھر تقابل میں خجالت کے کھلونے آئے

ہاتھ میں سنگ اٹھائے ہوئے بونے آئے

یوں تو اب بھی تِرے خط ڈاک میں مل جاتے ہیں

کوئی تحریر تو آنکھوں کو بھگونے آئے

اِس سے پہلے کہ کڑی دھوپ میں میلا ہو بدن

تُو اِسے لمس کی خوشبو سے بھی دھونے آئے

دوش ہوا کے سات بہت دور تک گئی

دوشِ ہوا کے سات بہت دُور تک گئی

خوشبو اُڑی تو رات بہت دور تک گئی

بادل برس رہا تھا کہ اک اجنبی کی چاپ

شب رکھ کے دل پہ ہات بہت دور تک گئی

یہ اور بات لب پہ تھی افسردگی کی مہر

برقِ تبسمات بہت دور تک گئی

نگار شب ترا مہمان ہو رہا ہوں میں

نگارِ شب! تِرا مہمان ہو رہا ہوں میں

وفا میں کرب کی پہچان ہو رہا ہوں میں

کھرچ رہا ہوں گئے موسموں کی ہر نسبت

نئی رُتوں کا شبستان ہو رہا ہوں میں

محیطِ تیرہ شبی کو شگفتِ لب دے کر

طلوعِ صبح کا امکان ہو رہا ہوں میں

دل کا شیشہ ٹوٹ گیا آوازے سے

دل کا شیشہ ٹوٹ گیا آوازے سے

تیرا پیار بھی کم نکلا اندازے سے

تم جو میری بات سنے بِن چل دیتے

رات لپٹ کر رو دیتا دروازے سے

رنجِ سکوں تو ترکِ وفا کا حصہ تھا

سوچ کے کتنے پھول کھلے خمیازے سے

موسم کی طرح رنگ بدلتا بھی بہت ہے

موسم کی طرح رنگ بدلتا بھی بہت ہے

ہمزاد مِرا قلب کا سادہ بھی بہت ہے

نفرت بھی محبت کی طرح کرتا ہے مجھ سے

وہ پیار بھی کرتا ہے، رلاتا بھی بہت ہے

وہ شخص بچھڑتا ہے تو برسوں نہیں ملتا

ملتا ہے تو پھر ٹوٹ کے ملتا بھی بہت ہے

وہ بھی اٹھا کے سنگ ملامت اداس تھا

وہ بھی اُٹھا کے سنگِ ملامت اُداس تھا
ہم کو بھی دوستی کے تقدس کا پاس تھا
ٹھوکر لگی تو آنکھ سے آنسو نکل پڑے
اک سنگِ رہگزارِ وفا غرقِ یاس تھا
پگھلا دیا تھا روح کو دوری کی آنچ نے
تیرے دُکھوں کا رنگ بدن کا لباس تھا

تم مرا دکھ تر و تازہ نہیں رہنے دیتے

تم مِرا دُکھ تر و تازہ نہیں رہنے دیتے
دشت کو ابر تو پیاسا نہیں رہنے دیتے
واہمے نت نئی اشکال بنا لیتے ہیں
ورقِ دل کو بھی سادہ نہیں رہنے دیتے
کتنے بے رحم ہیں یہ ہاتھ کہ فصلِ گل میں
شجر سبز پہ پتا نہیں رہنے دیتے

حبس تنہائی نہ دے حبس میں کیا رکھا ہے

حبس تنہائی نہ دے حبس میں کیا رکھا ہے
دل سا انگارہ تو پہلے ہی بُجھا رکھا ہے
اے مِرے شہر کی بے رحم زمیں کچھ تو بتا
تُو نے ہر موڑ پہ کیوں سنگِ جفا رکھا ہے
اک تِرا دُکھ ہو تو چہرے پہ بکھیرا جائے
کتنے غم ہیں جنہیں سینے سے لگا رکھا ہے

نہ سہی پیار حقارت سے کبھی بول کے دیکھ

نہ سہی پیار، حقارت سے کبھی بول کے دیکھ
کوئی تو زہر مِری رُوح میں تُو گھول کے دیکھ
میری آواز کہاں تک تِری دیوار بنے
شدتِ کرب سے تو بھی تو کبھی بول کے دیکھ
اپنی تنہائی کے اس گھور اندھیرے سے نکل
کیا ہے باہر کی فضا آنکھ ذرا کھول کے دیکھ

دکھ کی دیوار تلے روح کو سستانے دو

دکھ کی دیوار تلے روح کو سستانے دو
یہ جو طوفاں سا امڈ آیا ہے، رک جانے دو
مدتوں بعد تو پلٹا ہے بدل کر ملبوس
گھر کا دروازہ کھلا رکھو، اسے آنے دو
وقت بیمار مسافر ہے، گزر جائے گا
رائیگاں ایک بھی لمحہ نہ کوئی جانے دو

سکوں ہوا نہ میسر ہمیں فرار سے بھی

سکوں ہوا نہ میسر ہمیں فرار سے بھی
ملے ہیں زخم تِرے قُرب کی بہار سے بھی
متاعِ فقر بھی آئی نہ دستِ عجز کے ہاتھ
گریز پا ہی رہا، دولتِ وقار سے بھی
ہم اہل ِدل ہی نہ سمجھے، وفا کے منصب کو
ہوئی ہے ہم کو ندامت سِتم شعار سے بھی