اسیر لمحۂ موجود ہو گئے ہم بھی

 اسیر لمحۂ موجُود ہو گئے ہم بھی

خُود اپنی ذات کے سائے میں کھو گئے ہم بھی

لگاؤ سنگ صدا شیشۂ سکوت پہ آج

زمانے والو! پُکارو کہ سو گئے ہم بھی

لگے تو شاخ پہ اک برگِ زرد کی مانند

گِرے تو گردِ حقارت میں کھو گئے ہم بھی

نہ دیکھ پائے حقیقت کے ہولناک نقوش

ہزار رنگ نقابوں میں کھو گئے ہم بھی

ہمارا ذوقِ سخن گوئی صرف ذوق نہ تھا

کہ ایک عہد کو اس میں سمو گئے ہم بھی

غموں کی دھار وہی ہے الم کی کاٹ وہی

نہ جانے کیسے عیاں کُند ہو گئے ہم بھی

رشیدہ عیاں