تری اک چشم رحمت سے ترا بیمار بہتر ہے

عارفانہ کلام حمد نعت منقبت

تِری اِک چشمِ رحمت سے تِرا بیمار بہتر ہے

ہزاروں طِبی نسخوں سے نگاہِ یار بہتر ہے

جگہ مِل جائے گر پاپوش گاهِ یار میں مجھ کو

خوشا یہ مسندِ طاؤس سے صد بار بہتر ہے

شہنشاہی سے بڑھ کر ہے تِری پاپوش برداری

سکندر سے تِرا اِک خادمِ دربار بہتر ہے

تِرے لہجے کا زیر و بم ہے دلکش آبشاروں سے

گُلستاں سے تِری گُفتار کا گُلزار بہتر ہے

دیا ہے حُسنِ کُل نے حُسن ایسا تیری صورت کو

کہ دیدِ حُسنِ یوسفؑ سے تِرا دیدار بہتر ہے

مقام و مرتبہ ساری خدائی سے مِرے آقاﷺ

تِرا اِس پار بہتر ہے،۔ تِرا اُس پار بہتر ہے

مِرےآقاؐ سےخوشبو خُلد کی یوں عرض کرتی ہے

ہر اِک خوشبو سے تیرے جسم کی مہکار بہتر ہے

تِرے شیریں سُخن سے پھُول جَھڑتے ہیں فَصاحت کے

جنہیں چُن کر فَصاحت کا ہوا معیار بہتر ہے

حبیبِ کبریاﷺ کے عشق کو دل میں مکِیں کر لے

مُقدر عالمیں میں گر تجھے درکار بہتر ہے

کُھلا ہے اَیُّکُم مِثلِی سے یہ عُقدہ ندیم اختر

ہر اِک بہتر سے ذاتِ حق کا وه شہکار بہتر ہے

ندیم اختر