شہر انکار میں اقرار کے سکے کی کھنکتی رہی لذت جاناں

 شہر انکار میں اقرار کے سکے کی کھنکتی رہی لذت جاناں

رفتہ رفتہ ہوئی کافور وہ ہر بات پہ تکرار کی لذت جاناں

خوب روتا تھا وہ معصوم کبھی مان بھی جاتا تھا کھلونے لے کر

اس کو بہلانا تھا لازم کہ تھی بازار میں ہر رنگ کی راحت جاناں

کیا وہ تہذیب تھی خود دار جو مٹی میں پڑی یوں ہی تڑپتی ہی ملی

کیا بہ صد حسن طلب وقت کی دہلیز پہ بیٹھی ہے قیامت جاناں

کیا سروں کے ساتھ ہے سازش دھواں ہوتی ہوئی سی

 کیا سروں کے ساتھ ہے سازش دُھواں ہوتی ہوئی سی

پاؤں کے نیچے کوئی شے آسماں ہوتی ہوئی سی

ذہن کے آئینے میں گُلِ نُور مُرجھایا ہوا سا

مُشکِ قُربت، یاد جنت رائیگاں ہوتی ہوئی سی

عمر بھر آزار کی لذت، وہ شرطِ خوش کلامی

جم گئی نم دیدہ آنکھوں میں بیاں ہوتی ہوئی سی

اس نے کہا تھا چھوٹی سی فرمائش ہے

 بھیگا موسم

اس نے کہا تھا چھوٹی سی فرمائش ہے

میں نے کہا تھا بھولی بھالی خواہش ہے

اس نے کہا تھا روح میں خارش ہوتی ہے

میں نے کہا تھا جسموں کی سازش ہوتی ہے

اس نے کہا تھا بادل کالے ہوتے ہیں

شہر کا شہر ہے بیزار کہاں جاؤں میں

 شہر کا شہر ہے بے زار کہاں جاؤں میں

اور تنہائی ہے دُشوار کہاں جاؤں میں

لوگ مرتے ہیں سِسکتے ہیں مزے لیتے ہیں

دیکھ کر سرخئ اخبار کہاں جاؤں میں

تُو جو کہتا ہے کہ یہ خاکِ وطن تیری ہے

میں کہاں پر ہوں مِرے یار کہاں جاؤں میں

بھٹک رہی ہے روح کے اندر لذت سوکھی گیلی سی

 بھٹک رہی ہے روح کے اندر لذت سوکھی گیلی سی

جیسے رستہ بھول گئی ہو ایک ندی پتھریلی سی

میرے اس کے بیچ کا رشتہ اک مجبور ضرورت ہے

میں سُوکھے جذبوں کا ایندھن وہ ماچس کی تیلی سی

دیکھوں کیسی فصل اُگاتا ہے موسم تنہائی کا

درد کے بیج کی نسل ہے اونچی دل کی مٹی گیلی سی

مت اسے ہاتھ لگانا وہ سجن آگ ہے آگ

 مت اسے ہاتھ لگانا وہ سجن آگ ہے آگ

تم اسے خاک سمجھتے ہو بدن آگ ہے آگ

اس کی حسرت میں بھلے لوگ مَرے جاتے ہیں

کون سمجھائے کہ وہ غُنچہ دہن آگ ہے آگ

اپنی تہذیب کو پانی کی ضرورت ہو گی

چُوم آیا ہوں لبِ گنگ و جمن آگ ہے آگ

بدن کی راکھ سے روشن شرارہ کر کے دیکھوں گا

 بدن کی راکھ سے روشن شرارہ کر کے دیکھوں گا

میں اپنی جان کو اب کے ستارہ کر کے دیکھوں گا

وہ تنہا جستجو بے چین سی رہتی ہے آنکھوں میں

قیامت آ بھی جائے تو گوارہ کر کے دیکھوں گا

قضا اکثر مِرے کوچے سے بے پردہ گزرتی ہے

اسے بھی کھیلتے ہنستے اشارہ کر کے دیکھوں گا

دن بہت سفاک نکلا رات سب دکھ سہہ گئی

 دن بہت سفّاک نکلا رات سب دُکھ سہہ گئی

دانت میں انگلی دبائے شام تنہا رہ گئی

سنگریزوں کی طرح بکھری پڑی ہیں خواہشیں

دیکھتے ہی دیکھتے کس کی حویلی ڈھ گئی

صندلی خوابوں میں لپٹے تھے ہزاروں اژدہے

اور پھر تاثیر جسم و جاں میں تہہ در تہہ گئی

غلام سر پہ عبادت ابھی نہ رکھی جائے

 غلام سر پہ عبادت ابھی نہ رکھی جائے

خدا کے نام بغاوت ابھی نہ رکھی جائے

میں ٹھیک ٹھاک تو کر لوں حسب نسب اپنا

لہو پہ شرط ندامت ابھی نہ رکھی جائے

کہ جس کی آنچ سے جبریل آگہی جھُلسیں

انا میں اتنی تمازت ابھی نہ رکھی جائے

ستم کی انتہا پر چل رہی ہے

 ستم کی انتہا پر چل رہی ہے

یہ دنیا کس خدا پر چل رہی ہے

دلوں پر قہر کا موسم ہے کیسا

مِری بستی دعا پر چل رہی ہے

لہو سے کھیلتے ہیں سب فرشتے

سیاست فاتحہ پر چل رہی ہے