یقیں تو پھر یقیں رہا گماں کا کیا گماں گیا

 یقیں تو پھر یقیں رہا گماں کا کیا گماں گیا

حدودِ دو جہاں کو تج حضورِ لا مکاں گیا

اٹھی نقابِ رخ اُدھر، اِدھر سے شور اٹھا کہ دل

ابھی ابھی یہیں تو تھا کہاں گیا کہاں گیا

جدارِ کعبۂ یقیں میں پھر دراڑ آئے گی

بس اس امیدِ ناز میں یہ دل کشاں کشاں گیا

کبھی حرم کی راہ لی کبھی نجف کا رخ کیا

جدھر گیا تُو ساقیا! ہجومِ مے کشاں گیا

فراز شوق دید ہے کہ دل جنوں میں آخرش

جہاں خدا کے ماسوا کوئی نہ تھا وہاں گیا

علی فراز رضوی