رنگ اردو دنیا بھر کے نامور کلاسیک اور نوجوان اردو شعراء کے شاہکار کلام پر مبنی بلاگ🌷Rung E Urdu a blog of worldsfamous poetry of past & present era
عین منزل پہ آ کے کہوں کیا کہ یہ راستا اور ہے
ہم غلط آ گئے ہیں یہاں یا خدا کا پتا اور ہے؟
اب ہوس ہی نہیں عاشقی کی بھی معیاد کم ہے ذرا
دیکھ لو دعویداروں کی فہرستِ خوش کن میں کیا اور ہے
ہم سے یہ کوہِ وحشت ہو سر تو غمِ خیر و شر بھی کریں
یوں بھی اپنے لیے اب حسابِ سزا و جزا اور ہے
کب مدحِ گروہانِ خود آرا کے لیے ہے
رونا یہ مِرا، حلقۂ دانا کے لیے ہے
اب کیا وہاں سینے سے ہٹے کوہِ مصیبت
ہونا ہی جہاں وحشت و ایذا کے لیے ہے
پڑ جاتے ہیں بل پیٹ میں ہنستے ہوئے جس سے
یہ ڈھونگ بھی اک درد کے اِخفا کے لیے ہے
میں تجھ سے خوش نہیں ہوں تو اس کا سبب سمجھ
منہ مت بنا سمجھ، مِرا ذوقِ طلب سمجھ
یہ غم تو یوں بھی دردِ سرِ نسلِ نو نہیں
اب تو بھلے خوشی سے اسے بے ادب سمجھ
اک دن وہ مجھ سے کہنے لگا زعمِ حسن میں
تُو محض میرے کہنے پہ دن کو بھی شب سمجھ
جو کماتا ہوں سو گنواتا ہوں
اب اسی طور چین پاتا ہوں
وہ بہت جلد باز تھا اور میں
رفتہ رفتہ سمجھ میں آتا ہوں
تُو بھی اب کے خوشی سے ہاتھ ہلا
میں بھی پھر ایک بار آتا ہوں
بوجھ سینے سے ہٹانا پڑ گیا
دل لگی میں دل لگانا پڑ گیا
بے دلی سے صبح نکلے کام کو
شام کو پھر گھر بھی جانا پڑ گیا
ایک ہی تو نام ہم کو یاد تھا
اس کو بھی آخر بھلانا پڑ گیا
گِلہ نمو کا نہ دل میں خزاں کا غم رکھا
میں جس کی شاخ ہوں اس پیڑ کا بھرم رکھا
وہ ایک غم ہی تو دل بستگی کا ساماں ہے
تمام عمر ہمیں جس نے تازہ دم رکھا
کچھ اس لیے بھی میں کرتا ہوں احترام اس کا
سر آسماں کو چُھو کر بھی اس نے خَم رکھا
نیک نامی بھی گنواؤ گے دل و جان کے بعد
ہے رہِ شوق میں نقصان ہی نقصان کے بعد
جوڑ کر سلسلہ تاوان کا تاوان کے بعد
یار احسان جتا دیتے ہیں احسان کے بعد
دے ذرا زیست جو مہلت تو کبھی ہو یہ حساب
خود میں کتنا ہوں بچا میں تِرے فقدان کے بعد
سر آباد خیالوں سے خوابوں سے نگر آباد
ایک جہاں ہے باہر اپنے، اک اندر آباد
عشق تھا اپنی جگہ اٹل سمجھوتہ اپنی جا
ایک سے دل آباد رہا اور ایک سے گھر آباد
ساگر ساگر رونے والے، رو کر پھر مسکائے
رات رہے جو بستی ویراں، کرے سحر آباد
