کب سے پھرا رہا ہے جنوں کُو بہ کُو ہمیں
کر لو کبھی خدا کے لیے رُوبرُو ہمیں
بُجھتا ہوا چراغ ہے سُورج کے سامنے
لے آئی ہے کہاں پہ رہِ آرزُو ہمیں
کرتے ہیں اک سراب سے باتیں ہم آج کل
زمزم کی ریگزار میں ہے جُستجُو ہمیں
ڈُوبے ہیں کیوں انا کے سمندر میں سرگراں
ہستی کی مستعار ملی آبجُو ہمیں
صبحِ ازل جو آپ ہوئے ہم سے ہمکلام
یاد آ رہی ہے آج وہی گُفتگُو ہمیں
پھینکا تھا جو کسی کی طرف ہم نے ایک دن
پتھر لگا ہے آ کے وہی ہُو بہُو ہمیں
کمزور ہم ہوئے ہیں کہ بچے بڑے ہوئے
دیتے ہیں وہ جواب ابھی دُو بدُو ہمیں
ہونے لگا ہے آج ہدایت نشہ ہرن
کرنے لگا ہے عشق جو بے آبرُو ہمیں
ہدایت اللہ
No comments:
Post a Comment