آنسُو ہیں اور دیدۂ خُونبار دوستو
دامن ہے اور اشک گُہربار دوستو
آنکھوں میں چُبھ رہی ہے غمِ زندگی کی دُھوپ
بیٹھے ہیں زیرِ سایۂ دیوار دوستو
اب دل ہے اور ماتمِ صد شہرِ آرزو
اک سر ہے اور لاکھ خریدار دوستو
بے نُور ہو چکا ہے چراغِ حریمِ ناز
وِیراں ہے طاقِ ابروئے خمدار دوستو
دُھندلا گئی ہے مشعلِ عرفان و آگہی
کجلا گیا ہے شعلۂ افکار دوستو
شاید کہ زندگی کا سفر ختم ہو گیا
رُکنے لگی ہے سانس کی تلوار دوستو
اب رائیگاں ہے غمزۂ محبوبۂ بہار
اب ہم ہیں اور نرگسِ بیمار دوستو
منزہ انور گوئندی
No comments:
Post a Comment