اُمید کے چراغ سب بُجھا کے ہم رُکے نہیں
یوں عشق میں بساطِ جاں گنوا کے ہم رکے نہیں
تمہارا وصل کھینچ کر تو لا سکے نہ زندگی
تمہارے ہِجر کو گلے لگا کے ہم رکے نہیں
سوال اور جواب کے، عذاب سے رِہا ہوئے
ورق ورق کتابِ جاں جلا کے ہم رکے نہیں
یہ فلسفے وجُود کے، قیام کے، سجُود کے
خیالِ ہست و بُود سے مِٹا کے ہم رکے نہیں
مگن تھے باغِ وصل میں سو ایک روز یُوں ہُوا
کہ پھُول اور ببُول سب اُٹھا کے ہم رکے نہیں
ہدایت سائر
No comments:
Post a Comment