تیرے دیوانے ترے کوچے سے جب گزرے ہیں

 تیرے دیوانے تِرے کوچے سے جب گزرے ہیں

غم بہ دل، خاک بہ سر، آہ بہ لب گزرے ہیں

مسکراتے ہوئے جھیلے ہیں رفیقو! ہم نے

حادثے جو بھی سرِ راہِ طلب گزرے ہیں

یہ تو سب کچھ ہے بجا ناصحِ مشفق! لیکن

ہم پہ گزرے ہیں جو دن تم پہ وہ کب گزرے ہیں

جن کی آنکھوں میں ہے اشکوں کے تلاطم کا سماں

ان فقیروں پہ بھی ایامِ طرب گزرے ہیں

ساتھیو! قہر بھری، زہر بھری راہوں میں

روند کر ہم ہی دل ظلمتِ شب گزرے ہیں

اشرف قدسی