دیکھ افق کے پیلے پن میں دور وہ منظر ڈوب گیا

 دیکھ افق کے پیلے پن میں دور وہ منظر ڈوب گیا

جیسے کسی بیمار کے رخ پر رنگ ابھر کر ڈوب گیا

جھوٹی آس کے پنکھ لگا کر سات سمندر اڑ آیا

تیرے قرب کی خوشبو پا کر میں ساحل پر ڈوب گیا

یاد کی اے سیلی دیوارو! اب کے ایسا لگتا ہے

حال کی طغیانی میں جیسے ماضی کا گھر ڈوب گیا

عمر بھر پیش نظر ماہ تمام آتے رہے

 عمر بھر پیشِ نظر ماہِ تمام آتے رہے

چند چہرے آئینہ خانے کے کام آتے رہے

چند قطرے بھی نہ ٹپکے خواہشوں کی ریت پر

کیسے کیسے ابر تھے بالائے بام آتے رہے

میرے ماضی کے افق پر چند جگنو تھے کہ جو

حال کی تیرہ شبی میں میرے کام آتے رہے

شام غم کی ہے عطا صبح مسرت دی ہے

 شامِ غم کی ہے عطا صبحِ مسرت دی ہے

زندگی نے ہمیں احساس کی دولت دی ہے

کیسے کیسے تِرے احساس کی چٹانوں کو

میں نے لفظوں میں تراشا ہے تو صورت دی ہے

میری مُٹھی میں ہے ہر خواب کی تعبیر، مگر

تُو نے اے وحشتِ دل کب مجھے مہلت دی ہے

ہمارے خواب ہماری پسند ہوتے گئے

 ہمارے خواب ہماری پسند ہوتے گئے

ہم اپنے آئینہ خانوں میں بند ہوتے گئے

یہ کیا ہوا کہ بہ ایں جسم اس سے ملتے رہے

مگر فراق کے صدمے دو چند ہوتے گئے

ہر ایک فتح پہ مغرور ہو رہا تھا وہ

ہر اک شکست پہ ہم خود پسند ہوتے گئے

بھولی بسری خواہشوں کا بوجھ آنکھوں پر نہ رکھ

بُھولی بِسری خواہشوں کا بوجھ آنکھوں پر نہ رکھ

خوبصورت آئینوں میں غم کا پس منظر نہ رکھ

دیکھ بڑھ کر شوخیاں موجوں کی اور قسمت کا کھیل

کشتیاں دریا کے سنجیدہ کناروں پر نہ رکھ

یا تو اُڑ جا ساتھ لے کر قید کی مجبوریاں

ورنہ اپنی جرأتوں کا نام بال و پر نہ رکھ

ہماری جیت یہی تھی کہ خود سے ہار آئے

 ہماری جیت یہی تھی کہ خود سے ہار آئے

کسی کے ہم پہ کئی قرض تھے اتار آئے

تمہاری یاد بھی ہے بازگشت کی آواز

جو ایک بار پکارو تو بار بار آئے

ہر ایک موڑ پہ جیسے وہ مڑ کے دیکھتا ہو

نظر کچھ ایسے مناظر پسِ غبار آئے