نہ بلبل میں نہ پروانے میں دیکھا

نہ بلبل میں نہ پروانے میں دیکھا

جو سودا اپنے دیوانے میں دیکھا

برابر اوس کی زلفوں کے سیہ بخت

میں اپنے بخت کو شانے میں دیکھا

کسی ہندو مسلماں نے خدا کو

نہ کعبے میں نہ بتخانے میں دیکھا

جگ میں بے محبوب جینا زندگی برباد ہے

کاملوں کی یہ سخن مدت سوں مجھ کو یاد ہے

جگ میں بے محبوب جینا زندگی برباد ہے

بندگی سوں سرو قد کی اک قدم باہر نہیں

سرو گلشن بیچ کہتے ہیں مگر آزاد ہے

بے مدد زلفوں کی اس کے حسن نے قیدی کیا

صید دلِ بے دام کرنا صنعتِ استاد ہے

ابر میں یاد یار آوے ہے

ابر میں یادِ یار آوے ہے 

گریہ بے اختیار آوے ہے 

باغ سے گل عذار آوے ہے 

بوئے گل پر سوار آوے ہے 

اے خزاں بھاگ جا چمن سے شتاب 

ورنہ فوجِ بہار آوے ہے 

ایک مدت سے طلب گار ہوں کن کا ان کا

ایک مدت سے طلبگار ہوں کن کا ان کا 

تشنۂ حسرت دیدار ہوں، کن کا ان کا 

جان کو بیچ کے یہ نقدِ دل اب لایا ہوں 

سب سے پہلے میں خریدار ہوں کن کا ان کا 

امتداد اس مِرے بیمار کا مت پوچھ طبیب 

روزِ میثاق سے بیمار ہوں کن کا ان کا 

مضمون خط کو دیکھ ترے ہم بہت ڈرے

مضمونِ خط کو دیکھ تِرے ہم بہت ڈرے 

جتنے مسودے تھے رہے طاق پر دھرے

جیتا ہے یا کہ مر گیا، دل کی خبر نہیں 

یادش بخیر ہو یا خدا مغفرت کرے

آرامِ زندگی نہیں اس دل کے ہاتھ سے 

عمرِ دوبارہ ہو جو یہ دشمن کہیں مرے

عاشقوں کے سیر کرنے کا جہاں ہی اور ہے

عاشقوں کے سیر کرنے کا جہاں ہی اور ہے

ان کے عالم کا زمیں اور آسماں ہی اور ہے

پوچھتا پھرتا ہے کیا ہر ایک سے ان کا سراغ

لامکاں ہیں ان کے رہنے کا مکاں ہی اور ہے

کیا خریدے گا خراب آباد کے بازار میں

درد کی ہر جنس جس میں وہ دوکاں ہی اور ہے

جاتے ہوئے ادھر بھی وہ جانا نہ ہو گیا

جاتے ہوئے ادھر بھی وہ جانا، نہ ہو گیا

آئینہ خانہ دل کا، پری خانہ ہو گیا

لکھتا تھا سوزِ دل کا میں اس شمع رو کے تئیں

کاغذ بھی تاؤ کھا پرِ پروانہ ہو گیا

زنجیر زلف کی تِرے حلقوں میں یک بیک

دل سا سیانا دیکھتے دیوانہ ہو گیا

کہاں چلے ہو مجھے چھوڑ دوستاں تنہا

کہاں چلے ہو مجھے چھوڑ دوستاں تنہا

میں بِن تمہارے رہوں کس طرح یہاں تنہا

کہا اے یار نظر کر، کہ روزِ اول سے

جو اس جہان سے آیا ہے اس جہاں تنہا

دو دم کی سیر کر آپس میں باغِ دنیا بیچ

اسی طرح سے چلا جائے گا وہاں تنہا

اس دکھ میں ہائے یار یگانے کدھر گئے

اس دکھ میں ہائے یار یگانے کدھر گئے

سب چھوڑ ہم کو غم میں نہ جانے کدھر گئے

جو اس پری کو شیشۂ دل میں اتارتے 

وے علمِ عاشقی کے سیانے کدھر گئے

معلوم ہے کسی کو کہ وہ آج شعلہ خُو

مجھ کو لگا کے آگ لگانے کدھر گئے

بھرا مستوں نے ہے مے خانۂ عشق

بھرا مستوں نے ہے میخانۂ عشق

سدا لبریز ہے پیمانۂ عشق

جلے ہے کس مزے سے شمع رو پر

دلِ عشاق ہے پروانۂ عشق

جنوں کے دشت گردوں کی نظر میں

ہے رشکِ گلستان پروانۂ عشق

درد دل میری آہ سے پوچھو

دردِ دل میری آہ سے پوچھو

سبب اس کی نگاہ سے پوچھو

باعثِ تیرہ بختئ عالم

اسکی زلفِ سیاہ سے پوچھو

اسکی تیغِ ستم کا شرح و بیاں

جا کسی بے گناہ سے پوچھو

جب سنا موتی نے تجھ دنداں کے موتی کا بہا

جب سُنا موتی نے تجھ دنداں کے موتی کا بہا

آب میں شرمندگی سوں ڈوب جوں پانی بہا

مردماں کو دیکھ کر بِسمل تِرے کوچہ کے بیچ

ڈر گیا اور چشم سے آنسو کے جا ہے خوں بہا

اب تمہارے سُرخ لب ہم نے تاڑ کر پوچھا تھا مول

جوہری کہنے لگے یہ لعل ہے گا بے بہا

آب حیات جا کے کسو نے پیا تو کیا

آبِ حیات جا کے کسو نے پیا تو کیا

مانند خضرؑ جگ میں اکیلا جیا تو کیا

شیریں لباں سوں سنگدلوں کو اثر نہیں

فرہاد کام کوہ کنی کا کیا تو کیا

جلنا لگن میں شمع صفت سخت کام ہے

پروانہ یوں شتاب عبث جی دیا تو کیا

یہاں طالعوں سے ملتا ہے پیارا

یہاں طالعوں سے ملتا ہے پیارا

عبث دیکھے ہے زاہد استخارا

میں پایا ہوں ولے تجھ چشم کا بھید

نہ مانگوں کا کبھی ان کا اشارا 

نہالِ دوستی کو کاٹ ڈالا

دِکھا کر شوخ نے اَبرو کا آرا

شیخ تو تو مرید ہستی ہے

شیخ! تُو تو مریدِ ہستی ہے
مۓ غفلت کی تجھ کو مستی ہے
طوفِ دل چھوڑ جائے کعبہ کو
بس کہ فطرت میں تیری پستی ہے
کیوں چڑھے ہیں گدھے گدھے اوپر
تیری داڑھی کو خلق ہنستی ہے

یار کا مجھ کو اس سبب سے ڈر ہے

یار کا مجھ کو اس سبب سے ڈر ہے

شوخ ظالم ہے اور سِتم گر ہے​

دیکھ سرو چمن تِرے قد کُوں

خجل ہے، پاگل ہے، بے بر ہے

حق میں عاشق کے تجھ لباں کا بچن

قند ہے، نیشکر ہے، شکر ہے

خال اس کے نے دل لیا میرا

خال اس کے نے دل لِیا میرا

تِل میں ان نے لہو پِیا میرا

جان بے درد کو ملا کیوں تھا

آگے آیا مِرے کِیا میرا 

اسکے کوچہ میں مجھ کو پھِرتا دیکھ

رشک کھاتی ہے آسیا میرا

چھپا نہیں جابجا حاضر ہے پیارا

چھپا نہیں جابجا حاضر ہے پیارا

کہاں وہ چشم جو ماریں نظارا

جدا نہیں سب ستی تحقیق کر دیکھ

ملا ہے سب سے اور سب سے ہے نیارا

مسافر اٹھ تجھے چلنا ہے منزل

بجے ہے کوچ کا ہر دم نقارا