بھُوک سے بچے بِلکتے ہیں نہ جانے کتنے
اور پانی میں بہا دیتے ہیں دانے کتنے
اک تمنّا کا ہوا خُون تو کیا غم اے دوست
دفن ہیں سینے میں ارمان نہ جانے کتنے
کبھی اوروں کی کبھی اپنی حماقت کے طُفیل
ہاتھ آتے رہے ہنسنے کے بہانے کتنے
زندگی ایک حقیقت بھی ہے، افسانہ بھی
ہر گلی کُوچے میں بکھرے ہیں فسانے کتنے
اک گُل تازہ کی تخلیق میں اے گُل چینو
جانے قُدرت نے لُٹائے ہیں خزانے کتنے
میری رُوداد کو سب اپنا فسانہ سمجھے
اک فسانے میں ہیں پوشیدہ فسانے کتنے
حوصلہ بخشا ہے جینے کا انہی خوابوں نے
ہم نے دیکھے ہیں خلش خواب سُہانے کتنے
خلش کلکتوی
رشید الزماں
No comments:
Post a Comment