رنگ اردو دنیا بھر کے نامور کلاسیک اور نوجوان اردو شعراء کے شاہکار کلام پر مبنی بلاگ🌷Rung E Urdu a blog of worldsfamous poetry of past & present era
فرصتِ مرہمی نہ تھی، زخم چِھلا، چِھلا رہا
صبح سے شام تک وہی کام کا سِلسلہ رہا
ذہن میں وحشتیں نہ ہوں، دل تو ہو پر زِ درد و غم
مانا کہ خام تھا جنوں، شوق بھی بے صِلہ رہا؟
جوشِ نمو بھی ہے بجا، لمحے بھی ہیں طرب فزا
خدشہ سا دل میں ہے کہ وقت، سَم تو نہیں پلا رہا
فصلِ بہار ہو چکی، پھُول کوئی کِھلا نہیں
میں ہی خِزاں نصیب تھا، تجھ سے کوئی گِلہ نہیں
کچھ تو بہ پاسِ دوستی، ضبطِ خُوشی کی جہد کر
بار پہ میری ہنس مگر، ایسے تو کِھلکھلا نہیں
ہم نے یہ سوچ کر کِیا فرضِ نیاز سے گریز
ترک پر کیوں عتاب ہو، کرنے پہ جب صِلہ نہیں
سخن آباد کی تنہائی میں جا رہنے کا
ہم کو ڈھب آتا ہے پاداشِ ہنر سہنے کا
آپ کی چشم میں کوئی قمر آئے تو آئے
رشکِ خورشید ہوں سو میں تو نہیں گہنے کا
منتِ لفظ و زباں کیونکہ اٹھائی جائے
چشمِ خوش کار کو معلوم ہے ڈھب کہنے کا
آہوں کے کوئی ڈھب ہیں نہ رونے کے قرِینے
فُرقت کو بڑھایا ہے مِری کم ہُنری نے
مقصُود پہ ہیں پیشِ رقیبانِ پریدہ
کیا اُڑنا سِکھایا ہمیں بے بال و پری نے
طائر وہیں بستے ہیں جہاں سنگ نہ آئیں
آباد رکھا مجھ کو مِری بے ثمری نے
جانے کس اوج پہ جاتا ہے جنُوں، کس سے کہوں
آگ پہلے تو نہ تھی خُون میں یوں، کس سے کہوں
کس نے دن تِیرہ کیے، پڑھ کے اندھیروں کا طلسم
لوگ ہیں سب اسی کے زیرِ فسُوں، کس سے کہوں
سنگ سے قلب، چٹانوں کی سماعت پِگھلائے
گرم اتنا بھی نہیں سوزِ درُوں، کس سے کہوں
