تمہیں اپنوں نے سمجھا ہے نہ بیگانے سمجھتے ہیں
سمجھتے ہیں تو کچھ ہم جیسے دیوانے سمجھتے ہیں
تِری محفل کا ہر پیمانہ🍷، پیمانہ سہی، لیکن
جو ہم تک آئیں ہم تو ان کو پیمانے سمجھتے ہیں
غمِ جاناں لیے بیٹھے ہیں آغوشِ تصور میں
غمِ دوراں کو اب کیا چیز دِیوانے سمجھتے ہیں
نہیں معلوم یہ خوش فہمیاں کس روز جائیں گی
ابھی تک لوگ مے خانوں کو میخانے سمجھتے ہیں
بقیدِ ہوش رہ کر بھی جنہیں جِینا نہیں آتا
خدا کی شان ہے وہ ہم کو دِیوانے سمجھتے ہیں
سرِ محفل چھلک پڑتے ہیں میری تشنہ کامی پر
جسے ساقی نہ سمجھا اس کو پیمانے سمجھتے ہیں
غرورِ حُسن، نازِ دلبری کو کوئی کیا جانے
یہ ان کی بات ہے یہ ان کے دِیوانے سمجھتے ہیں
گدازِ عشق کے ہی صرف دلدادہ نہیں ناطق
گدازِ عشق کی قیمت بھی پروانے سمجھتے ہیں
ناطق مالوی
No comments:
Post a Comment