ہم جو ٹوٹے تو غم دہر کا پیمانہ بنے

 ہم جو ٹوٹے تو غمِ دہر کا پیمانہ بنے

خاک میں مل کے بھی خاک‌ رہ میخانہ بنے

کون اس بزم میں سمجھے گا غم دل کی زباں

بات چھوٹی سی جب افسانہ در افسانہ بنے

سنگ اندازوں سے اونچا ہے بہت اپنا مقام

ورنہ ممکن تھا نشانہ سر دیوانہ بنے

دل میں اب تک ہے کہیں، تیرے آنے کا گماں

 دل میں اب تک ہے کہیں، تیرے آنے کا گماں

تجھ کو کھونے کی کسک تجھ کو پانے کا گماں

چاند تکتا ہی رہا،۔ اور وہ روتی ہی رہی

اس کو تکیے پہ رہا میرے شانے کا گماں

اس دوراہے سے بھلا کس طرف جائیں بتا

یاد رکھنے کی قسم، بھول جانے کا گماں

آگ اپنے ہی دامن کی ذرا پہلے بجھا لو

 آگ اپنے ہی دامن کی ذرا پہلے بجھا لو

فرصت ہو تو پھر ہم کو بھی جلنے سے بچا لو

اے قسمتِ فردا کے خوش آئند خیالو

راتیں نہ سہی، دن ہی مِرے آ کے اُجالو

پتھر کے صنم بھی کبھی کچھ بول سکے ہیں

اے بُت شکن اذہان کے خاموش سوالو

شب و روز تماشہ خیالات کی زنجیر کہاں کٹتی ہے

 شب و روز تماشہ

ذہن جب تک ہے

خیالات کی زنجیر کہاں کٹتی ہے

ہونٹ جب تک ہیں

سوالات کی زنجیر کہاں کٹتی ہے

بحث کرتے رہو لکھتے رہو نظمیں غزلیں

گمان و شک کے تلاطم اتار پار مجھے

گمان و شک کے تلاطم اتار پار مجھے

نہیں کنارا تو گرداب میں اتار مجھے

جو گل تھے زینتِ دستارِ شہسوارِ بہار

ملے ہیں بن کے غبارِ پسِ بہار مجھے

صلیبِ معرفتِ ذات کائنات ہے آج

وہ دن گئے کہ خوش آتی تھی کوئے یار مجھے

اک زمانے سے نہیں فرصت عشق خوباں

اک زمانے سے نہیں فرصتِ عشقِ خوباں

اپنی وحشت پہ ہے اب بھولے فسانوں کا گماں

فکر کی آگ میں جلنا ہے جہنم کا عذاب

ہو خلا سر میں تو دنیا بھی ہے جنت کا مکاں

رخصتِ غم بھی جو ملتی ہے تو اک دو دن کی

کوئی بچھڑے تو اسے ڈھونڈنے جائیں گے کہاں

سایہ ہے جہاں پھولوں کا وہ در نہیں ملتے

سایہ ہے جہاں پھولوں کا، وہ در نہیں ملتے

جو خلدِ دل و دیدہ ہیں وہ گھر نہیں ملتے

قرآنِ صداقت کو پیمبر نہیں ملتے

جبریل ہیں خاموش، سخن ور نہیں ملتے

خالی ہے مکاں دل کا کے دلبر نہیں ملتے

نظروں کو جو پڑھ لیں وہ نظر ور نہیں ملتے

تم جو نہیں ہو رہنے لگی گھر کے اندر تنہائی

تم جو نہیں ہو، رہنے لگی گھر کے اندر تنہائی

محفل سے بھی مجھ کو اٹھا لاتی ہے جا کر تنہائی

کر کے وداع جو تم کو لوٹا، یار احباب نے بتلایا

پوچھ رہی تھی ملنے والوں سے میرا گھر تنہائی

میں تو کتابوں کی دنیا میں خود کو بہلا لیتا ہوں

میرے نام سے خط لکھتی ہے تم کو اکثر تنہائی

دیوانوں کو منزل کا پتا یاد نہیں ہے

دیوانوں کو منزل کا پتا یاد نہیں ہے

جب سے تِرا نقشِ کفِ پا یاد نہیں ہے

افسردگئ عشق کے کھلتے نہیں اسباب

کیا بات بھلا بیٹھے ہیں کیا یاد نہیں ہے

ہم دلزدگاں جیتے ہیں یادوں کے سہارے

ہاں مٹ گئے جس پر وہ ادا یاد نہیں ہے

دفترِ لوح و قلم یا درِ غم کھلتا ہے

دفترِ لوح و قلم یا درِ غم کھلتا ہے

ہونٹ کھلتے ہیں تو اک بابِ ستم کھلتا ہے

حرفِ انکار ہے کیوں نازِ جہنم کا حلیف

صرف اقرار پہ کیوں بابِ ارم کھلتا ہے

آبرو ہو نہ جو پیاری تو یہ دنیا ہے سخی

ہاتھ پھیلاؤ تو یہ طرزِ کرم کھلتا ہے

تو غزل بن کے اتر بات مکمل ہو جائے

تو غزل بن کے اتر بات مکمل ہو جائے

منتظر دل کی مناجات مکمل ہو جائے

عمر بھر ملتے رہے پھر بھی نہ ملنے پائے

اس طرح مل، کہ ملاقات مکمل ہو جائے

دن میں بکھرا ہوں بہت، رات سمیٹے گی مجھے

تُو بھی آ جا تو مِری ذات مکمل ہو جائے

کیسا اس بزم کے لٹنے کا سماں ہوتا ہے

کیسا اس بزم کے لٹنے کا سماں ہوتا ہے

جس پہ ہر صبح اجڑنے کا گماں ہوتا ہے

میرے روٹھے ہوئے خوابوں ہی کی آواز نہ ہو

کون یہ پچھلے پہر نوحہ کناں ہوتا ہے

عمرِ ہر غم ہے بس اتنی تِرے اک غم کے سوا

شمع بجھ جائے تو پَل بھر کو دھواں ہوتا ہے

رات بھر خواب کے دریا میں سویرا دیکھا

رات بھر خواب کے دریا میں سویرا دیکھا

دن کے ساحل پہ جو اترے تو اندھیرا دیکھا

خود کو لکھا بھی ہے میں نے مٹایا بھی ہے خود

قلمِ غیر نے سایہ بھی نہ میرا دیکھا

جن کے چہروں پہ چمک، نور کا ہالا اطراف

ان کے ذہنوں کو جو کھولا تو اندھیرا دیکھا

جس کو مانا تھا خدا خاک کا پیکر نکلا

جس کو مانا تھا خدا خاک کا پیکر نکلا
ہاتھ آیا جو یقیں،۔ وہم سراسر نکلا
اک سفر دشت خرابی سرابوں تک ہے
آنکھ کھولی تو جہاں خواب کا منظر نکلا
کل جہاں ظلم نے کاٹی تھیں سروں کی فصلیں
نم ہوئی ہے تو اسی خاک سے لشکر نکلا