سائے کے حق میں کچھ نہیں میرے بیان میں

 سائے کے حق میں کچھ نہیں میرے بیان میں

جو آپ چھپتا پھرتا ہے ہر سائبان میں

یہ چھوٹے چھوٹے شوق بھی اس کو روا نہیں

جس کو بڑا بنایا گیا خاندان میں

مجھ کو ہے آدمی سے توقع خلوص کی

سونا تلاش کرتا ہوں مٹی کی کان میں

عکس ابھرا نہیں آئینہ دلداری کا

 عکس ابھرا نہیں آئینہ دلداری کا

ہجر نے کھینچ لیا دائرہ زنگاری کا

ناز کرتا تھا طوالت پہ کہ وقت رخصت

بھید سائے پہ کھلا شام کی عیاری کا

جس قدر خرچ کئے سانس ہوئی ارزانی

نرخ گرتا گیا رسم و رہِ بازاری کا

پھر جو کٹتی نہیں اس رات سے خوف آتا ہے

پھر جو کٹتی نہیں اس رات سے خوف آتا ہے

سو ہمیں شامِ ملاقات سے خوف آتا ہے

ماند پڑتے ہوئے جذبات سے خوف آتا ہے

عمرِ آخر کی شروعات سے خوف آتا ہے

پھونکتا جاتا ہے یہ شعلۂ تخلیق مجھے

اب تو اپنے ہی کمالات سے خوف آتا ہے

ہمارے حق میں کسی کے جفر رمل کوئی نئیں

ہمارے حق میں کسی کے جفر، رمل کوئی نئیں

جو اہلِ دل کے مسائل ہیں، ان کا حل کوئی نئیں

عجیب شہر میں میرا جنم ہوا ہے جہاں 

بدی کا حل کوئی نئیں، نیکیوں کا پھل کوئی نئیں

مِرے لیے نہ رکے کوئی موجِ استقبال

میں رزقِ لمحۂ حاضر ہوں، میرا کل کوئی نئیں

جس میں ہو پائیں گرفتار وہ پل ڈھونڈتے ہیں

جس میں ہو پائیں گرفتار وہ پَل ڈھونڈتے ہیں

آج تک ہم تِری آنکھوں کا بدل ڈھونڈتے ہیں

عہدِ بارود! کچھ احساس مِرے بچوں کا

کیاریاں سِینچتے پھرتے ہیں، کنول ڈھونڈتے ہیں

فلسفوں نے تو کہیں کا نہیں چھوڑا ہم کو

اب کوئی مختلف اندازِ عمل ڈھونڈتے ہیں

بندہ قرار دے کے ڈرانے لگے مجھے

بندہ قرار دے کے ڈرانے لگے مجھے

میرے بناۓ بُت ہی بنانے لگے مجھے

کیسا نیا خیال مِرے ذہن میں جگا

یکدم تمام لفظ پرانے لگے مجھے

کس منہ سے اب پروں کی تمنا کِیا کروں 

میرے تخیلات اڑانے لگے مجھے

حسن ایسا کہ جو سب کو نظر آنے کا نہیں

حسن ایسا کہ جو سب کو نظر آنے کا نہیں

عشق اتنا کہ مِرے دل میں سمانے کا نہیں

بات ہے اور زباں پر نہیں لانے والی

راز ہے اور کسی سے بھی چھپانے کا نہیں

جی میں آتی ہے کہ لَے اور اٹھاتا جاؤں

اور یہ گیت کسی کو بھی سنانے کا نہیں

گر کسی چشم گہر بیں سے شناسا ہوتا

گر کسی چشمِ گہر بِیں سے شناسا ہوتا

میں وہ سِکہ تھا کہ ہر ملک میں چلتا ہوتا

شاخِ دل اب بھی لچکتی ہے اسی حسرت میں

کاش اِس پر بھی پرندہ کوئی بیٹھا ہوتا 

موجۂ بادِ خبر! گرم مزاجی اتنی

تُو جو صحراؤں میں ہوتا تو بگولہ ہوتا

مدتوں میں بہم ہوئے ماضی و حال دیر تک

مدتوں میں بہم ہوئے ماضی و حال دیر تک

ذہن میں پر فشاں رہی ، گردِ ملال دیر تک

رہ نہیں پائے گی یہی صورتِ حال دیر تک

کس کا کمال دیر تک، کس کا زوال دیر تک 

تیغ بکف سوار تو گرد اڑا کے چل دئیے 

کانپتا رہ گیا وہاں ایک نہال دیر تک

اڑاتے آئے ہو کیا اپنے خواب زار کی خاک

اڑاتے آۓ ہو کیا اپنے خواب زار کی خاک

یہ اور خاک ہے، اک دشتِ بے کنار کی خاک

ڈرا رہے ہو سفر کی صعوبتوں سے ہمیں

تمہارے منہ میں بھی خاک اور رہگزار کی خاک

یہ میں نہیں ہوں تو پھر کس کی آمد آمد ہے

خوشی سے ناچتی پھرتی ہے رہگزار کی خاک

رنگ کا نور کا بو باس کا دھوکا ہی نہ ہو

رنگ کا، نور کا، بو باس کا دھوکا ہی نہ ہو 

زندگی عشرتِ احساس کا دھوکا ہی نہ ہو 

جیسے اک خواب ہوا عہدِ گزشتہ کا ثبات

دمِ آیندہ مِری آس کا دھوکا ہی نہ ہو

یہ نگیں بھی نہ ہو بس معجزۂ تارِ نظر 

یہ ہنر گوہر و الماس کا دھوکا ہی نہ ہو 

راستہ اس کا جو روکے گا وہ مر جائے گا

راستہ اس کا جو روکے گا وہ مر جائے گا

وقت دریا ہے بہر طور گزر جائے گا

ذہن میں اتنی بھی تشکیک نہ رکھی جائے

عشق پانی تو نہیں ہے کہ اتر جائے گا

دوستو! بھائیو! نیکی کے لیے کچھ کیجو

خیر آئے گی تو اس شہر سے شر جائے گا

سب کا پیرایہ اظہار بدل جاتا ہے

سب کا پیرایۂ اظہار بدل جاتا ہے

منہ میں لقمہ ہو تو پندار بدل جاتا ہے

گام دو گام پہ ہوتی ہے جب اپنی نصرت

تو ہمارا سپہ سالار بدل جاتا ہے

جب کبھی ہم کسی معیار پہ پورے اتریں

ایسا ہوتا ہے وہ معیار بدل جاتا ہے

ہوئے ہجرت پہ مائل پھر مکیں آہستہ آہستہ

ہوئے ہجرت پہ مائل پھر مکیں آہستہ آہستہ

بہت سی خواہشیں دل سے گئیں آہستہ آہستہ

ہوا اس سانحے میں غیر جانبدار نکلی، سو

دھوئیں کی ایک دو موجیں اٹھیں آہستہ آہستہ

مجھے ماہِ منور نے بہت الجھائے رکھا، اور

سمندر کھا گئے میری زمیں،۔۔ آہستہ آہستہ

قفس ہے جو بہ شکل سائباں رکھا ہوا ہے

قفس ہے جو بہ شکلِ سائباں رکھا ہوا ہے

ہمارے سر پہ یہ جو آسماں رکھا ہوا ہے

تِری آنکھوں میں کیوں جھلکا نہیں رنگِ تمنا

تِرے سینے میں دل کیا رائیگاں رکھا ہوا ہے 

تکبر سے کمر کوزہ ہوئی ہے آسماں کی

زمیں کو خاکساری نے جواں رکھا ہوا ہے

پوچھ مت نارسا دعاؤں کی

پوچھ مت نارسا دعاؤں کی

دیکھ تنویر کہکشاؤں کی

بے زمیں راستے ہوئے آباد

اڑ گئی نیند دیوتاؤں کی

آسماں ہے کہ چادرِ تخیّل

کہکشاں ہے کہ دھول پاؤں کی

کبھی رستہ نہیں ملتا کبھی محور نہیں ملتا

کبھی رستہ نہیں ملتا،۔ کبھی محور نہیں ملتا

زمیں پاؤں سے سرکی ہے، فلک سر پر نہیں ملتا

جو محروم بصیرت ہو، وہ محروم بصارت ہے

کبھی آنکھیں نہیں کھلتیں، کبھی منظر نہیں ملتا

تو ملبوسِ نظارہ ہے تو میں نظروں کا جوہر ہوں

تجھے آنکھوں کی محرومی، مجھے پیکر نہیں ملتا

کیا بات بتاؤں میں تمہیں خوش نظراں کی

مُسکا کے جدھر دیکھیں، نئے پھول کھِلا دیں

کیا بات بتاؤں میں تمہیں خوش نظراں کی

اٹکھیلیاں کرتی ہے تِری یاد بھی کیا کیا

دل تک چلی آئی ہے ٹہلتی ہوئی بانکی

اے عہدِ گزشتہ کو بلاتے ہوئے لوگو

قیمت نہیں معلوم تمہیں عمرِ رواں کی

اک بات عیاں کی ہے تو اک بات نہاں کی

اک بات عیاں کی ہے تو اک بات نہاں کی

ہو خیر مِرے دوست تِری طرزِ بیاں کی

میں اوجِ تخیّل پہ یونہی تو نہیں جاتا

تصویر بناتا ہوں وہاں سے میں یہاں کی

مت پوچھئے کس طرح ہُوا عشق میں کندن

اس جسم کے ایندھن میں جلا، سانس دھواں کی

لفظ سے ماورا سوال بھی ہیں

لفظ سے ماورأ سوال بھی ہیں

کینوس سے بڑے خیال بھی ہیں

ان یُگوں سے پرے، گماں سے ورأ

بے کراں روز و ماہ و سال بھی ہیں

مِری آنکھوں کو سرسری مت دیکھ

ان میں کچھ رنگ لازوال بھی ہیں