ہلتی ہے زلف جنبش گردن کے ساتھ ساتھ

 ہلتی ہے زلف جنبش گردن کے ساتھ ساتھ

ناگن بھی ہے لگی ہوئی رہزن کے ساتھ ساتھ

کس کی کدورتوں سے یہ مٹی خراب ہے

کس کا غبار ہے تِرے دامن کے ساتھ ساتھ

اٹھا تھا منہ چھپائے ہوئے میں ہی صبح کو

جاتا تھا میں ہی رات کو دشمن کے ساتھ ساتھ

خیر یوں ہی سہی تسکیں ہو کہیں تھوڑی سی

 خیر یوں ہی سہی تسکیں ہو کہیں تھوڑی سی

ہاں تو کہتے ہو مگر ساتھ نہیں تھوڑی سی

حال دل سن کے مِرا برسر رحمت تو ہیں کچھ

ابھی باقی ہے مگر چین بہ جبیں تھوڑی سی

ہوئی جاتی ہے سحر ایسا بھی گھبرانا کیا

رات گر ہے بھی تو اے ماہ جبیں تھوڑی سی

کبھی ملتے تھے وہ ہم سے زمانہ یاد آتا ہے

کبھی ملتے تھے وہ ہم سے زمانہ یاد آتا ہے

بدل کر وضع چھپ کر شب کو آنا یاد آتا ہے

وہ باتیں بھولی بھولی اور وہ شوخی ناز و غمزہ کی

وہ ہنس ہنس کر تِرا مجھ کو رلانا یاد آتا ہے

گلے میں ڈال کر بانہیں وہ لب سے لب ملا دینا

پھر اپنے ہاتھ سے ساغر پلانا یاد آتا ہے

چھیڑ منظور ہے کیا عاشق دل گیر کے ساتھ

چھیڑ منظور ہے کیا عاشق دلگیر کے ساتھ

خط بھی آیا کبھی تو غیر کی تحریر کے ساتھ

گو کہ اقرار غلط تھا مگر اک تھی تسکین

اب تو انکار ہے کچھ اور ہی تقریر کے ساتھ

دور ایسے نہ کھیچو پاس بھی آؤ گے کبھی

وہ گئے دن جو یہ نالے نہ تھے تاثیر کے ساتھ

وہ بگڑے ہیں رکے بیٹھے ہیں جھنجلاتے ہیں لڑتے ہیں

وہ بگڑے ہیں رکے بیٹھے ہیں جھنجلاتے ہیں لڑتے ہیں

کبھی ہم جوڑتے ہیں ہاتھ،۔ گاہے پاؤں پڑتے ہیں

گئے ہیں ہوش ایسے، گَر کہیں جانے کو اٹھتا ہوں

تو جاتا ہوں اِدھر کو، اور اُدھر کو پاؤں پڑتے ہیں

جو تم کو اک شکایت ہے تو مجھ کو لاکھ شکوے ہیں

لو آؤ، مل بھی "جاؤ" یہ کہیں قصے "نبڑتے" ہیں

ایسے کو شب وصل لگائے کوئی کیا ہاتھ

ایسے کو شبِ وصل لگائے کوئی کیا ہاتھ؟

"ہر بار جھٹک کر جو کہے "ٹوٹے تِرا ہاتھ

اس بات کے ملنے کی بھی کچھ پائی گئی بات

قاصد تِرے صدقے پہ اگر سچ ہے تو لا ہاتھ

یوں آپ کریں غیر کے شکوے مِرے آگے

"یہ آپ کے "مضمون" نیا آج لگا "ہاتھ

اس کا گلہ نہیں نہ ہو وعدہ وفا نہ ہو

اس کا گلہ نہیں، نہ ہو وعدہ وفا نہ ہو

اتنا تو ہو کہ رشک مجھے غیر کا نہ ہو

انداز اپنا آئینے میں دیکھتے ہیں وہ

اور یہ بھی دیکھتے ہیں کوئی دیکھتا نہ ہو

اٹکھیلیوں سے چلتے ہیں اور کس ادا کے ساتھ

مڑ مڑ کے دیکھتے ہیں، کوئی دیکھتا نہ ہو

ضائع نہیں ہوتی کبھی تدبیر کسی کی

ضائع نہیں ہوتی کبھی تدبیر کسی کی

میری سی خدایا نہ ہو تقدیر کسی کی

ناحق میں بگڑ جانے کی عادت یہ غضب ہے

ثابت تو کِیا کیجئے تقصیر کسی کی

قاصد یہ زبانی تِری باتیں تو سنی ہیں

تب جانوں کہ لا دے مجھے تحریر کسی کی

وہ جانتے نہیں مجھے کچھ بھی نظام کیا

وہ جانتے نہیں مجھے کچھ بھی نظامؔ کیا

ہر اک سے سے پوچھتے ہیں کہ اسکا ہے نام کیا

میرے تو ہوش ہی نہیں، قاصد تُو ہی بتا

مضمون اس کو کیا لکھوں، بھیجوں پیام کیا

مجھ کو سنا سنا کے وہ کہنا کسی کا ہائے

جس سے کہ جی میں رنج ہو، اس سے کلام کیا

نہیں سوجھتا کوئی چارا مجھے

نہیں سُوجھتا کوئی چارا مجھے 

تمہاری جدائی نے مارا مجھے 

اُدھر آنکھ لڑتی ہے اغیار سے

اِدھر کرتے جانا اشارا مجھے 

تُو اک بار سن لے مِرا حال کچھ

نہ کچھ کہنے دینا دوبارا مجھے 

زیست سے ہاتھ اٹھائے بیٹھے ہیں

زیست سے ہاتھ اٹھائے بیٹھے ہیں

عشق کا تیر کھائے بیٹھے ہیں

وہ اشاروں میں ان کا کہنا ہائے

دیکھو اپنے پرائے بیٹھے ہیں 

چشمِ گریاں! یہ کس نے پونچھے اشک

دیکھ تو کون آئے بیٹھے ہیں؟

تنگ آیا ہوں یا خدا توبہ

تنگ آیا ہوں یا خدا! توبہ

دل کا کہنا کروں میں یا توبہ؟

دل میں خواہش ہے ظاہراً، توبہ

دل کا کہنا کروں میں یا توبہ؟

مجھ سے اور الفتِ بتاں چھُوٹے

ایسی باتوں سے ناصحا! توبہ

انگڑائی بھی وہ لینے نہ پائے اٹھا کے ہاتھ

انگڑائی بھی وہ لینے نہ پائے اٹھا کے ہاتھ

دیکھا جو مجھ کو چھوڑ دئیے مسکرا کے ہاتھ

بے ساختہ نگاہیں جو آپس میں مل گئیں

کیا منہ پر اس نے رکھ لیے آنکھیں چرا کے ہاتھ

یہ بھی نیا ستم ہے حنا تو لگائیں غیر

اور اس کی داد چاہیں وہ مجھ کو دکھا کے ہاتھ

ایسے کو شب وصل لگائے کوئی کیا ہاتھ

ایسے کو شبِ وصل لگائے کوئی کیا ہاتھ

ہر بار جھٹک کر جو کہے ٹوٹے ترا ہاتھ

یوں آپ کریں غیر کے شکوے مرے آگے

یہ آپ کے مضمون نیا آج لگا ہاتھ

اس بات کے ملنے کی بھی کچھ پائی گئی بات

قاصد تِرے صدقے پہ اگر سچ ہے تو لا ہاتھ

وہ نہیں آتا گر نہیں آتا

وہ نہیں آتا گر نہیں آتا

جا کے کیوں نامہ بر نہیں آتا

آپ سے ایسی بے وفائی ہو

یہ یقیں آپ پر نہیں آتا

یاد آتا ہے اس کا جب آنا

ہوش دو دو پہر نہیں آتا