یہ دلخراش و اداس صبحیں وبال شامیں عذاب راتیں

 یہ دلخراش و اداس صبحیں, وبال شامیں, عذاب راتیں

جمالِ خوباں، پرانا قصہ، جنوں، محبت، فضول باتیں

دیارِ کلفت کے چارہ گر یہ ستم گرانِ جہاں نما ہیں

یہ گرگ بیٹھے ہیں چلمنوں میں جگہ جگہ پر لگی ہیں گھاتیں

خدا دکھائے گا دن تمہیں جب اٹھائے جاؤ گے مرقدوں سے

زمین اُگلے گی سب دفینے، پھٹیں گی افلاک کی قناتیں

جھیل کنارے چھم چھم کرتی اجلی بانکی ناروں پر

 جھیل کنارے چھم چھم کرتی اجلی بانکی ناروں پر

من کا سودا کر بیٹھے افسوس تِرے بنجاروں پر

یورپ میں ہم درویشوں نے درویشی کو دان کیا

سنگل کھائے، زہر پیا اور لوٹے پھر انگاروں پر

کل شب پھونکا کیسا جادوگر ہوں پر ان ناگوں نے

جسم جلے طنبورے باجے اوس گری بازاروں پر

اس بحر بے کراں کے کنارے کھڑے ہوئے

 اس بحرِ بیکراں کے کنارے کھڑے ہوئے

ساحل بھی دیکھتا ہے مجھے ڈوبتے ہوئے

اچھوں کی کچھ کمی نہیں دنیا میں دوستو

ہم کو تمام عمر یہی شائبے ہوئے

پنجوں کو پھر نشاط میں چاٹا زبان سے

بلی نے اک پرند کے پر نوچتے ہوئے

جھیل کی تلچھٹ میں بیٹھی کسمساتی ریت ہوں

 جھیل کی تلچھٹ میں بیٹھی کسمساتی ریت ہوں

روشنی ہو جاؤں گا پھر کائناتی ریت ہوں

پیش خیمہ ہوں کسی طوفانِ خشم آلود کا

نقرئی جملہ افق کو گدگداتی ریت ہوں

آفرینش نے مجھے کوٹا تھا کاری ضرب سے

مجھ کو اڑنا ہے ابد تک کھنکھناتی ریت ہوں

اندھیارے کی اس آڑھت میں سب کچھ بیچا جا سکتا ہے

اندھیارے کی اس آڑھت میں سب کچھ بیچا جا سکتا ہے

روح کی بولی لگ جاتی ہے جسم خریدا جا سکتا ہے

دامنِ چاک کا رونا کیسا چاک جگر کے سل جاتے ہیں

درد زیادہ بڑھ جائے تو دل بھی دھویا جا سکتا ہے

اس نے میسیج میں پوچھا ہے مجھ سے مل کر کیا کرنا ہے

میں نے کہا جی سچ پوچھیں تو زلف سے کھیلا جا سکتا ہے