جھیل کی تلچھٹ میں بیٹھی کسمساتی ریت ہوں
روشنی ہو جاؤں گا پھر کائناتی ریت ہوں
پیش خیمہ ہوں کسی طوفانِ خشم آلود کا
نقرئی جملہ افق کو گدگداتی ریت ہوں
آفرینش نے مجھے کوٹا تھا کاری ضرب سے
مجھ کو اڑنا ہے ابد تک کھنکھناتی ریت ہوں
اے خدائے آہ و گریہ! ابر وحشت تھام لے
میں وقوفِ نیم شب میں گڑگڑاتی ریت ہوں
کیسے کیسے آسمانوں سے تنوع کر کے میں
آب زمیں کو جھیلتا ہوں بے ثباتی ریت ہوں
دیکھ اے شیریں دہن! یہ تلملاتے لب تِرے
میرے ہونٹوں سے ملے کہتے رجھاتی ریت ہوں
مجھ میں رہتا ہے مِرا اپنا تنفس کارگر
خود ہی اپنی ریت کو میں آزماتی ریت ہوں
دیکھ لے مجھ کو نظر بھر کر یہ چرخِ بے پناہ
عارضِ دشتِ زمن پر پیچ کھاتی ریت ہوں
شعیب افضال
No comments:
Post a Comment