پہلے انسان محبت میں مرا ہے شاید

 پہلے انسان محبت میں مرا ہے شاید

زہر تو بعد میں ایجاد ہوا ہے شاید

تُو بہت شوق سے سنتا ہے کہانی غم کی

تُو محبت کے مریضوں میں نیا ہے شاید

لفظ احساس کو تصویر نہیں کر سکتے

عشق دنیا کی زبانوں سے بڑا ہے شاید

اپنے بیمار کی حالت بھی نہیں پوچھتا اب

وہ مسیحا بھی مجھے بھول گیا ہے شاید

دل کی حد درجہ مروت کا سبب جانتے ہو

یہ وہ پتھر ہے جو اشکوں سے کٹا ہے شاید

حسن کی طرح تِرا عشق مکمل تھا مگر

یہ جدائی مِری قسمت کا لکھا ہے شاید

میں جسے ڈھونڈ رہا ہوں تِرے خال و خد میں

در حقیقت کہیں خوابوں میں بسا ہے شاید

زیب دیتا ہے اسے اتنا تغافل مجھ سے

وہ کہیں اور بھی مصروف وفا ہے شاید

نعمان بدر