جیون راگ
ہم خواب بنیں ان آنکھوں کے
جو تارِ بدن کو چُھو لیں تو
خواہش کی سیما سے آگے
سُر سنگم کے دربار لگیں
اور درباری کی لے اندر
کچھ دھیمے سے کچھ اونچے سے
جو گیت لبوں پر پھول بنیں
وہ خوشبو خوشبو مہکائیں
وہ آنکھیں جب جب ہنس دیں تو
ایمن کے راگ فضاؤں میں
اک وصل خوشی کی آہٹ پر
چوتھے اور پانچویں کالے میں
سنگت جو کریں تو جھوم اٹھیں
سب روپ سروپ کی رادھائیں
چرنوں کو چُھونے آ جائیں
وہ دیپک لمبی تانوں کا
پھیلے تو راتیں روشن ہوں
پانی میں آگ بھڑک اٹھے
جسموں کی تمازت جاگ اٹھے
جب خواب نگر کے تاروں سے
یہ گیان اور دھیان کریں باتیں
تو بھیرویں شانت بھرے من میں
ہر تال پہ نور سرور بڑھے
آشائیں پروں کو پھیلائیں
آفاق پہ آنکھیں اگ آئیں
جب دور سلگتے صحرا میں
پیلو جو ہجر سمیٹے تو
میرا کے ترسے ہونٹوں پر
گیتوں کی پپڑی جم جائے
حلقوم کا کانٹا ہو جائے
آوازیں بھاری ہو جائیں
ان آنکھوں سے بارش برسے
ملہار کے پنچم کو چھیڑے
تو اندر باہر دھل جائے
باگیشری برہا کے اندر
ہلچل سی ایک بپا کر دے
ہو لمبی رات جدائی کی
تاریک مناظر ہو جائیں
اور سمے کی نبصیں تھم جائیں
جب تان للت کی ٹوٹے تو
ان خواب سروں کی راکھ اڑے
آنکھیں ننداسی ہو جائیں
ارشد معراج
No comments:
Post a Comment