ہو تم کو مبارک محبت وغیرہ

 ہمارے گھروں میں ہیں روٹی کے لالے

ہو تم کو مبارک محبت وغیرہ

ہے بیٹی کی گُھٹی میں شامل ازل سے

یہ قربانی، جُھکنا، اطاعت وغیرہ

ہمارا سمے تو کوئی بھی نہیں ہے

گھڑی کو مبارک یہ ساعت وغیرہ

ہماری لکیروں میں سختی لکھی ہے

کہ جچتی ہے تم پر نزاکت وغیرہ

کہ قابیل تو ہابیل کا قاتل رہا ہے

سو نسلوں میں گردش ہلاکت وغیرہ

چلیں جب ہوائیں تو پتے گرائیں

ستاتی ہے مجھ کو یہ آہٹ وغیرہ

ہمیشہ رہوں میں تِرے دل میں قیدی

گوارا نہیں ہے ضمانت وغیرہ

ہمیشہ ہی تیور چڑھائے رکھے ہو

کبھی تو دکھاؤ لطافت وغیرہ

سپاہی ہمارے بہادر جواں ہیں

ہے شامل لہو میں شجاعت وغیرہ

ثمرین افتخار