یہ وحشت یونہی بے معنی نہیں ہے

یہ وحشت یونہی بے معنی نہیں ہے

کہ ساتھ اس کی نگہبانی نہیں ہے

اسے چاہا تھا جس شدت سے تُو نے

وہ بچھڑا ہے تو حیرانی نہیں ہے

سمندر ہے میری پلکوں کے نیچے

وہ کہتا ہے؛ یہاں پانی نہیں ہے

میری وحشت سے ہے آباد صحرا

میری راہوں میں ویرانی نہیں ہے

قیامت آئی تھی چہرہ بدل کر

مکمل تُو نے پہچانی نہیں ہے

مسلسل پڑھ رہی ہوں زیست تجھ کو

فقط اوراق گردانی نہیں ہے

تیری یادیں میرا رخت سفر ہیں

سفر میں اب پریشانی نہیں ہے

سنبھل کر خرچ کر آنکھوں سے تارا

سفر لمبا ہے، اور پانی نہیں ہے

تارا اقبال