کاش وہ پہلی محبت کے زمانے آتے

 کاش وہ پہلی محبت کے زمانے آتے

چاند سے لوگ مِرا چاند سجانے آتے

رقص کرتی ہوئی پھر باد بہاراں آتی

پھول لے کر وہ مجھے خود ہی بلانے آتے

ان کی تحریر میں الفاظ وہی سب ہوتے

یوں بھی ہوتا کہ کبھی خط بھی پرانے آتے

شکستہ دل اندھیری شب اکیلا راہبر کیوں ہو

 شکستہ دل اندھیری شب اکیلا راہبر کیوں ہو

نہ ہو جب ہمسفر کوئی تو اپنا بھی سفر کیوں ہو

کسی کی یاد میں آنسو کا رشتہ اس طرح رکھو

کہ دل پہلو اگر بدلے تو چہرہ تر بتر کیوں ہو

مِرے ہمدم، مِرے دلبر، ذرا اتنا بتا دینا

کوئی بے درد ہو تو درد دل میں اس قدر کیوں ہو

یہ موسم سرمئی ہے اور میں ہوں

 یہ موسم سرمئی ہے اور میں ہوں

مگر بس خامشی ہے اور میں ہوں

نہ جانے کب وہ بدلے رخ ادھر کو

مسلسل بے رخی ہے اور میں ہوں

تغافل پر تغافل ہو رہے ہیں

کسی کی دل لگی ہے اور میں ہوں

ہزار خواب لیے جی رہی ہیں سب آنکھیں

 ہزار خواب لیے جی رہی ہیں سب آنکھیں

ترے بنا ہیں مگر میری بے سبب آنکھیں

چمکتے چاند ☪ ستارو! گواہ تم رہنا

لگی رہی ہیں فلک سے تمام شب آنکھیں

تمہارے سامنے رہتی ہیں نیم وا ہمدم

حیا شناس بہت ہیں یہ با ادب آنکھیں

محبت میں آیا ہے تنہا ابھی رنگ

محبت میں آیا ہے تنہا ابھی رنگ

بدلنے لگی ہے مگر زندگی رنگ

بہاروں کے آنچل میں خوشبو چھپی ہے

گلوں کی صبا میں بھرے ہیں سبھی رنگ

تمہارے بِنا سب ادھورے ہیں جاناں

صبا، پھول، خوشبو، چمن، روشنی، رنگ

شفق کے رنگ نکلنے کے بعد آئی ہے

شفق کے رنگ نکلنے کے بعد آئی ہے

یہ شام دھوپ میں چلنے کے بعد آئی ہے

یہ روشنی تِرے کمرے میں خود نہیں آئی

شمع کا جسم پگھلنے کے بعد آئی ہے

اسی طرح سے رکھو بند میری آنکھیں اب

کہ نیند خواب بدلنے کے بعد آئی ہے

دل کے بے چین جزیروں میں اتر جائے گا

دل کے بے چین جزیروں میں اتر جائے گا 

درد آہوں کے مقدر کا پتہ لائے گا 

میرے بچھڑے ہوئے لمحات سجا کر رکھنا 

وقت لفظوں میں غزل بن کے ٹھہر جائے گا 

اس کی ہر بات جفا پیشہ ہوئی ہے اکثر 

زخم کا خوف کبھی اس کو بھی دہلائے گا 

کبھی مڑ کے پھر اسی راہ پر نہ تو آئے تم نہ تو آئے ہم

کبھی مڑ کے پھر اسی راہ پر، نہ تو آئے تم نہ تو آئے ہم

کبھی فاصلوں کو سمیٹ کر، نہ تو آئے تم نہ تو آئے ہم

جو تمہیں ہے اپنی انا پسند، تو مجھے شرط کا پاس ہے

یہ ضدوں کے سلسلے توڑ کر، نہ تو آئے تم نہ تو آئے ہم

انہیں چاہتوں میں بندھے ہوئے ابھی تم بھی ہو ابھی ہم بھی ہیں

ہے کشش دلوں میں بہت مگر، نہ تو آئے تم نہ تو آئے ہم

اس سے مت کہنا مری بے سر و سامانی تک

اس سے مت کہنا مِری بے سروسامانی تک

وہ نہ آ جائے کہیں مِری پریشانی تک

میں تو کچھ بھی نہیں کرتی ہوں محبت کیلئے

عشق والے تو لٹا دیتے ہیں سلطانی تک

کیسے صحرا میں بھٹکتا ہے مِرا تشنہ لب

کیسی بستی ہے جہاں ملتا نہیں پانی تک 

ابھی سے کیسے کہوں تم کو بے وفا صاحب

ابھی سے کیسے کہوں تم کو بیوفا صاحب

ابھی تو اپنے سفر کی ہے ابتدا صاحب

نہ جانے کتنے لقب دے رہا ہے دل تم کو 

حضور، جان وفا، اور ہم نوا صاحب

تمہاری یاد میں تارے شمار کرتی ہوں

نہ جانے ختم کہاں ہو یہ سلسلہ صاحب

کاش وہ پہلی محبت کے زمانے آتے

کاش وہ پہلی محبت کے زمانے آتے
چاند سے لوگ مِرا چاند سجانے آتے
رقص کرتی ہوئی پھر بادِ بہاراں آتی
پھول لے کر وہ مجھے خود ہی بلانے آتے
ان کی تحریر میں الفاظ وہی سب ہوتے
یوں بھی ہوتا کہ کبھی خط وہ پرانے آتے

ترے خیال کا چرچا ترے خیال کی بات

تِرے خیال کا چرچا تِرے خیال کی بات
شبِ فراق میں پیہم رہی وصال کی بات
تم اپنی چارہ گری کو نہ پھر کرو رُسوا
ہمارے حال پہ چھوڑو ہمارے حال کی بات
کماں سی ابرو کا عالم عجیب ہے دیکھو
فلک کے چاند سے بہتر ہے اس ہلال کی بات

وہ عجیب شخص تھا بھیڑ میں جو نظر میں ایسے اتر گیا

وہ عجیب شخص تھا بھِیڑ میں جو نظر میں ایسے اتر گیا
جسے دیکھ کر مِرے ہونٹ پر مِرا اپنا شعر ٹھہر گیا
کئی شعر اس کی نگاہ سے مِرے رخ پہ آ کے غزل بنے
وہ نِرالا طرزِ پیام تھا جو سخن کی حد سے گزر گیا
وہ ہر ایک لفظ میں چاند تھا، وہ ہر ایک حرف میں نور تھا
وہ چمکتے مصرعوں کا عکس تھا جو غزل میں خود ہی سنور گیا

مجھے رنگ دے نہ سرور دے مرے دل میں خود کو اتار دے

مجھے رنگ دے نہ سرور دے مِرے دل میں خود کو اتار دے
مِرے لفظ سارے مہک اٹھیں، مجھے ایسی کوئی بہار دے
مجھے دھوپ میں تُو قریب کر، مجھے سایہ اپنا نصیب کر
مِری نکہتوں کو عروج دے مجھے پھول جیسا وقار دے
مِری بکھری حالتِ زار ہے، نہ تو چین ہے نہ قرار ہے
مجھے لمس اپنا نواز کے، مِرے جسم و جاں کو نِکھار دے