ہم دل جلوں کو اے بت نامہرباں نہ چھیڑ

ہم دل جلوں کو اے بتِ نامہرباں نہ چھیڑ

بھڑکے گا اور شعلۂ سوزِ نہاں، نہ چھیڑ

صیاد اور خزاں کے ستم اس پہ کم نہیں

تُو عندلیبِ زار کو، اے باغباں! نہ چھیڑ

ہے، ہے، کسی کی بزم مجھے یاد آ گئی

واعظ! خدا کے واسطے، ذکرِ جناں نہ چھیڑ

طائر دِل کے لیے زلف کا جال اچھا ہے

طائرِ دِل کے لیے زلف کا جال اچھا ہے

حیلہ سازی کے لیے دانۂ خال اچھا ہے

دل کے طالب نظر آتے ہیں حسِین، ہر جانب 

اس کے لاکھوں ہیں خریدار، کہ مال اچھا ہے

تابِ نظارہ نہیں گو مجھے خود بھی، لیکن 

رشک کہتا ہے، کہ ایسا ہی جمال اچھا ہے

نظر اٹھا دل ناداں یہ جستجو کیا ہے

نظر اٹھا دلِ ناداں یہ جستجو کیا ہے

اسی کا جلوہ تو ہے اور روبرو کیا ہے 

کسی کی ایک نظر نے بتا دیا مجھ کو

سرورِ بادہ بے ساغر و سبو کیا ہے

قفس عذاب سہی، بلبلِ اسیر!، مگر

ذرا یہ سوچ کہ وہ دامِ رنگ و بو کیا ہے 

کیا سنائیں کسی کو حال اپنا

کیا سنائیں کسی کو حال اپنا

اپنے دل میں رہے ملال اپنا

شرمسار جواب ہو نہ سکا

بسکہ خوددار تھا سوال اپنا

کس نے دیکھا نہیں ہے بعد عروج

سایۂ چرخ میں زوال اپنا

ستم کوئی نیا ایجاد کرنا

ستم کوئی نیا ایجاد کرنا

تو مجھ کو بھی مِری جاں یاد کرنا

قیامت ہے دل نالاں قیامت

تِرا رہ رہ کے یہ فریاد کرنا

چلو اب لطف ہی کو آزماؤ 

تمہیں آتا نہیں بے داد کرنا

رہی فراق میں بھی شکل رو برو تیری

رہی فراق میں بھی شکل روبرو تیری

شبہیہ کھینچی تصور نے ہوبہو تیری

معاف رکھ جو ہے گُلہائے تر سے پیار مجھے

کہ اِن میں رنگ تِرا کچھ ہے، کچھ ہے بو تیری

نسیمِ صبح کا جھونکا نفس نفس تیرا

رہے گی سوختہ جانوں کو آرزو تیری

تن خاکی رہے گا ہمرہ انوار جاں کب تک

تنِ خاکی رہے گا ہم رہِ انوارِ جاں کب تک

چلے گی کارواں کے ساتھ گردِ کارواں کب تک

اِدھر بھی ایک جھونکا اے ہوائے فصلِ آزادی

رہوں زنجیرئ اندیشۂ سود و زیاں کب تک

نسیمِ فصلِ گُل آئی نہ ان بارہ مہینوں میں

رہے گی باغ میں اے باغباں دورِ خزاں کب تک

ہجراں کی شب جو درد کے مارے اداس ہیں

ہجراں کی شب جو درد کے مارے اداس ہیں

ان کی نظر میں چاند ستارے اداس ہیں

آنکھیں وہ پھر گئیں کہ زمانہ الٹ گیا

جیتے تھے جو نظر کے سہارے اداس ہیں

کیا ہیر اب کہیں ہے نہ رانجھے کا جانشیں

کیوں اے چناب! تیرے کنارے اداس ہیں

اس کا گلہ نہیں کہ دعا بے اثر گئی

اس کا گِلہ نہیں کہ دعا بے اثر گئی

اک آہ کی تھی وہ بھی کہیں جا کے مر گئی

اے ہم نفس! نہ پوچھ جوانی کا ماجرا

موجِ نسیم تھی، اِدھر آئی، اُدھر گئی 

دامِ غمِ حیات میں الجھا گئی امید

ہم یہ سمجھ رہے تھے کہ احسان کر گئی

نقش بر سطح آب ہے دنیا

نقش بر سطح آب ہے دنیا

بلکہ موجِ سراب ہے دنیا

ایک حالت پہ رہ نہیں سکتی

پیکرِ انقلاب ہے دنیا 

شبِ غفلت ہے زندگی اپنی 

اس میں نیرنگِ خواب ہے دنیا