تن خاکی رہے گا ہمرہ انوار جاں کب تک

تنِ خاکی رہے گا ہم رہِ انوارِ جاں کب تک

چلے گی کارواں کے ساتھ گردِ کارواں کب تک

اِدھر بھی ایک جھونکا اے ہوائے فصلِ آزادی

رہوں زنجیرئ اندیشۂ سود و زیاں کب تک

نسیمِ فصلِ گُل آئی نہ ان بارہ مہینوں میں

رہے گی باغ میں اے باغباں دورِ خزاں کب تک

نہ کیوں ہم دیدۂ خونبار سے گُل کاریاں کر لیں

رہیں آخر بہ امیدِ بہارِ گُل فشاں کب تک

وطن کی یاد مٹتے مٹتے مٹ جاتی ہے غربت میں

قفس میں تابشِ داغِ فراقِ آشیاں کب تک

سبک ہے یا گراں اے زندگی! آخر ہے تُو اپنی

تجھے اپنائیں گے، تجھ سے رہیں گے سرگراں کب تک

اجاڑی جائے گی کب تک زمیں از بہرِ آبادی

لڑی جائیں گی جنگیں از پۓ امن و اماں کب تک

صلہ حسنِ عمل کا خونِ دل ہے اِس زمانے میں

مرے کام آۓ گی رنگینئ حسنِ بیاں کب تک

وہی اک حسرتِ ناکام ہے اور اِس کا رونا ہے

کئے جاؤ گے محرومؔ اِس کو زیبِ داستاں کب تک

تلوک چند محروم