ہر ایک شعر تری ہی مثال ہے کہ نہیں

ہر ایک شعر تِری ہی مثال ہے کہ نہیں

سخنوری میں یہ دستِ کمال ہے کہ نہیں

میں تیرے نام کی خاطر ہی ٹوٹ کر بکھرا

مِری شکست کا تجھ کو ملال ہے کہ نہیں

جواب دے کہ نہ دے یہ تِری رضا لیکن

سوال یہ ہے کہ اِذنِ سوال ہے کہ نہیں

ہر ایک شخص نے سیکھا درندگی کا چلن

تِرے جہان میں قحط الرجال ہے کہ نہیں

بگولے دشت و بیاباں کے مجھ سے پوچھتے ہیں

کہ دشتِ دل میں بھی تِرا غزال ہے کہ نہیں

قدم قدم پہ مشینوں کا شور ہے خاورؔ

حدودِ شہر میں رہنا محال ہے کہ نہیں

خاور زیدی