اس دور پر آشوب میں اے عید نہ آ تو

عیدِ قرباں

اس دورِ پُر آشوب میں اے عید نہ آ تُو

آئی ہے تو اسلوبِ ابراہیمؑ سکھا تو

کشمیر کی جنت سے شہیدوں کا لہو مانگ

طاغوت کو اسلام کی طاقت سے ہرا تو

کونین کے آقاؐ کی رسالت کے علم کھول

توحید پرستوں کو سکھا صبر و رضا تو

اک نغمۂ جاں سوز بہ عنوانِ وفا چھیڑ

کونین کو دے اس کے تاثر سے جِلا تو

آفاق سے پیمانۂ ماہتاب طلب کر

شاعر کے دلآویز خیالوں میں سما تُو

آغا شورش کاشمیری