خیال سود نہ اندیشۂ زیاں ہے ابھی

 خیال سود نہ اندیشۂ زیاں ہے ابھی

چلے چلو کہ مذاقِ سفر جواں ہے ابھی

ہمارے نقشِ قدم سے چمک اٹھے شاید

فضائے منزلِ جاناں دھواں دھواں ہے ابھی

نئے نئے ہیں عزائم نئی نئی ہے تلاش

جمالِ دوست سے دل مطمئن کہاں ہے ابھی

حوادث ہمسفر اپنے تلاطم ہم عناں اپنا

حوادث ہم سفر اپنے، تلاطم ہم عناں اپنا

زمانہ لوٹ سکتا ہے، تو لوٹے کارواں اپنا

نسیمِ صبح سے کیا ٹوٹتا خوابِ گراں اپنا

کوئی نادان بجلی چھو گئی ہے آشیاں اپنا

ہمیں بھی دیکھ لو، آثارِ منزل دیکھنے والو

کبھی ہم نے بھی دیکھا تھا غبارِ کارواں اپنا

سوز حیات مانگ غم جاودانہ مانگ

سوزِ حیات مانگ، غمِ جاودانہ مانگ

اس جانِ مدعا سے مگر مدعا نہ مانگ

آوازِ بازگشت بھی مشکل سے آئے گی

غربت کو شرمسار نہ کر "ہمنوا" نہ مانگ

خونِ جگر سے "نقشِ تمنا" بنائے جا

اب زندگی سے فرصتِ ترکِ وفا نہ مانگ

وارفتگیِ شوق فسوں کار نہ ہو جائے

وارفتگئ شوق فسوں کار نہ ہو جائے

جلوؤں کو سنبھلنا کہیں دشوار نہ ہو جائے

رہبر جو ہمیں ٹھوکریں کھانے نہیں دیتا 

ڈرتا ہے کہیں راستہ ہموار نہ ہو جائے

مۓ خانہ بھی اک کارگہِ شیشہ گری ہے 

پیمانہ کہیں ٹوٹ کے تلوار نہ ہو جائے

طلب کی اگ کسی شعلہ رو سے روشن ہے

طلب کی اگ کسی شعلہ رو سے روشن ہے 

خیال ہو کہ نظر، آرزو سے روشن ہے

جنم جنم کے اندھیروں کو دے رہا ہے شکست 

وہ اک چراغ کہ اپنے لہو سے روشن ہے

کہیں ہجومِ حوادث میں کھو کے رہ جاتا

جمالِ یار مِری جستجو سے روشن ہے

قربان اپنی لغزش مستانہ وار کے

قربان اپنی لغزشِ مستانہ وار کے 

سائے قریب آ گئے دیوارِ یار کے

میرے جنوں کو زندگئ مستعار کے 

دو دن بھی قبول ہیں مگر اختیار کے

اے آفتابِ صبحِ بہاراں! سلام کر

دیوانے آ رہے ہیں شبِ غم گزار کے

دن پریشاں ہے رات بھاری ہے

دن پریشاں ہے، رات بھاری ہے

زندگی ہے کہ پھر بھی پیاری ہے

دل کی دھڑکن کا اعتبار نہیں

ورنہ، آواز تو تمہاری ہے

اس کے حسنِ ستم کا کیا کہنا

لوگ سمجھے خطا ہماری ہے

دل سے بھی شرمسار ہوئے کوئے یار میں

دل سے بھی شرمسار ہوئے کُوئے یار میں

ہم جا کے اور خوار ہوئے کوئے یار میں

دنیاۓ رنگ و بو میں یہ راحت کہاں نصیب 

شعلوں سے ہمکنار ہوئے کوئے یار میں

کیف و نشاط حسرتِ دیدار اب کہاں 

جلوے بھی ناگوار ہوئے کوئے یار میں

بہت نازک طبیعت ہو گئی ہے

بہت نازک طبیعت ہو گئی ہے

کسی سے کیا محبت ہو گئی ہے

نہیں ہوتی کہیں صَرفِ تماشا

نظر تیری امانت ہو گئی ہے

کہاں اب سلسلے دار و رسن کے

محبت بھی ندامت ہو گئی ہے

سر جھکاتے نہیں کٹاتے ہیں

عارفانہ کلام منقبت سلام مرثیہ

سر جھکاتے نہیں کٹاتے ہیں

حق کا رستہ ہمیں دکھاتے ہیں

یہ ہے احسان آلِ احمدﷺ کا

کہ لہو سے دِیے جلاتے ہیں

ایسے مرنے کی کی ہمیں تلقین

ایسے جینا ہمیں سکھاتے ہیں

نئے چراغ لئے شام بے کسی آئی

نئے چراغ لیے شامِ بے کسی آئی

کہ دل بجھا تو ستاروں میں روشنی آئی

جنونِ شوق نے پہنچا دیا کہاں مجھ کو

نگاہِ دوست بھی اکثر تھکی تھکی آئی

ہمارے پاس کہاں آنسوؤں کی سوغاتیں

کسی کو اپنا بنا کے بڑی ہنسی آئی

تڑپتی کوندتی ہر چیز قابل دل نہیں ہوتی

تڑپتی کوندتی ہر چیز قابل دل نہیں ہوتی

حرارت کرمکِ شب تاب سے حاصل نہیں ہوتی

کچھ ایسا مطمئن ہوں اپنی ناکامیٔ پیہم سے

کہ جیسے رہروِ غم کی کوئی منزل نہیں ہوتی

شکستِ جام پر مۓ خانہ سارا گونج اٹھتا ہے

مگر حیرت ہے، آوازِ شکستِ دل نہیں ہوتی

عمر بھر ہو نہ سکی جرأت فریاد مجھے

عمر بھر ہو نہ سکی جرأتِ فریاد مجھے

کس سلیقے سے کِیا آپ نے برباد مجھے

ماضی و حال ہم آغوش ہوئے جاتے ہیں

دیکھنا، کس نے پکارا دل ناشاد! مجھے

آؤ! اب، ایک نئے دور کا آغاز کریں

عہدِ رفتہ کی کوئی بات نہیں یاد مجھے

مدتوں ہم نے غم سنبھالے ہیں

مدتوں ہم نے غم سنبھالے ہیں

اب تیری یاد کے حوالے ہیں

زندگی کے حسین چہرے پر

غم نے کتنے حجاب ڈالے ہیں

کچھ غم زیست کے شکار ہوئے

کچھ مسیحا نے مار ڈالے ہیں

عام فیضان غم نہیں ہوتا

عام فیضانِ غم نہیں ہوتا

ہر نفس محترم نہیں ہوتا

یا محبت میں غم نہیں ہوتا

یا مِرا شوق کم نہیں ہوتا

نامرادی نے کر دیا خوددار

اب سرِ شوق خم نہیں ہوتا

اب یہ عالم ہے کہ غم کی بھی خبر ہوتی نہیں

اب یہ عالم ہے کہ غم کی بھی خبر ہوتی نہیں

اشک بہہ جاتے ہیں، لیکن آنکھ تر ہوتی نہیں

پھر کوئی کمبخت کشتی نذرِ طوفان ہو گئی

ورنہ ساحل پر اداسی اس قدر ہوتی نہیں

تیرا اندازِ تغافل ہے، جنوں میں آج کل

چاک کر لیتا ہوں دامن اور خبر ہوتی نہیں

کبھی مقتل کے مقابل کبھی زندان کے قریب

کبھی مقتل کے مقابل کبھی زِندان کے قریب

ہم بہر حال رہے منزلِ جاناں کے قریب

جھِلملاتے ہوئے تاروں نے بھی دَم توڑ دیا

آخرِ شب ہے چلے آؤ رگِ جان کے قریب

سینہ چاکانِ چمن آج ادھر سے گزرے

پھول ہی پھول نظر آتے ہیں زِندان کے قریب

غم چھیڑتا ہے ساز رگ جاں کبھی کبھی

غم چھیڑتا ہے سازِ رگِ جاں کبھی کبھی
ہوتی ہے کائنات غزل خواں کبھی کبھی
ہم نے دیئے ہیں عشق کو تیور نئے نئے
ان سے بھی ہو گئی ہیں گریزاں کبھی کبھی
اس حسنِ اتفاق کی تصویر کھینچ لو
ہوتے ہیں ایک ساحل و طوفاں کبھی کبھی

ترے دیار میں ہم سر جھکائے پھرتے ہیں

تِرے دیار میں ہم سر جھکائے پھرتے ہیں 

نگاہِ ناز کے احسان اٹھائے پھرتے ہیں 

کسی کی زُلف پریشان، کسی کا دامن چاک 

جنون کو لوگ تماشا بنائے پھرتے ہیں 

قدم قدم پہ لیا انتقام دنیا نے 

تجھ ہی کو جیسے گلے سے لگائے پھرتے ہیں 

دل دیوانہ عرض حال پر مائل تو کیا ہو گا

دلِ دیوانہ عرضِ حال پر مائل تو کیا ہو گا

مگر وہ پوچھ بیٹھے خود ہی حالِ دل تو کیا ہو گا

ہمارا کیا، ہمیں تو ڈوبنا ہے، ڈوب جائیں گے

مگر، طوفان جا پہنچا لبِ ساحل تو کیا ہو گا

زرابِ ناب ہی سے ہوش اڑ جاتے ہیں انساں کے

تِرا کیفِ نظر بھی ہو گیا شامل تو کیا ہو گا