دل سے بھی شرمسار ہوئے کوئے یار میں

دل سے بھی شرمسار ہوئے کُوئے یار میں

ہم جا کے اور خوار ہوئے کوئے یار میں

دنیاۓ رنگ و بو میں یہ راحت کہاں نصیب 

شعلوں سے ہمکنار ہوئے کوئے یار میں

کیف و نشاط حسرتِ دیدار اب کہاں 

جلوے بھی ناگوار ہوئے کوئے یار میں

جن کے سہارے منزلِ غم ہم نے کاٹ دی 

وہ حوصلے شکار ہوئے کوئے یار میں

مدت سے ہنس رہے تھے غم روزگار پہ 

جی بھر کے اشک بار ہوئے کوئے یار میں

قابلؔ گئے نہ سایۂ دیوار چھوڑ کر 

کیا کیا جگر فگار ہوئے کوئے یار میں

قابل اجمیری