یہ مت سمجھ کے صاحب کردار نہیں ہوں

 یہ مت سمجھ کے صاحبِ کردار نہیں ہوں

جیسا بھی ہوں میں رونقِ بازار نہیں ہوں

بھاتی ہیں دل کو گو یہ تِری مسکراہٹیں

لیکن میں اس ادا کا طلبگار نہیں ہوں

جو بات تجھ میں ہے وہ کسی اور میں کہاں

لیکن میں تِرے پیار کا حقدار نہیں ہوں

مخمور کر دیا ہے تِری چشمِ مست نے 

سرشار ہو کہ بھی کہوں، سرشار نہیں ہوں

چاہت تو دل میں ہے تِری، ملنا محال ہے

کر کے وفا بھی تیرا وفادار نہیں ہوں

بے فکر ہو کے مجھ کو بھلا دے عدوئے جاں

بس یوں سمجھ کہ میں تِرا دلدار نہیں ہوں

مجھ کو تو ہر کسی کی وفا محترم رہی

توڑوں میں دل کسی کا وہ فنکار نہیں ہوں

ارشادؔ، کیا کروں یہ ہیں مجبوریاں مِری

غمخوار ہو کہ بھی تِرا غمخوار نہیں ہوں

ارشاد دہلوی