ہوا کا جھونکا جو ہے مرا غم شناس اب تک ذرا ذرا سا

 ہوا کا جھونکا جو ہے مرا غم شناس اب تک ذرا ذرا سا

مِری طرح اس گلی میں ہے بے حواس اب تک ذرا ذرا سا

سنا سنا کر لطیفے خود کو، میں قہقہے تک تو آ گیا ہوں

تمہارا ٹھکرایا دل ہے لیکن اداس اب تک ذرا ذرا سا

کسی کے ہمراہ تیز بارش میں بھیگ کر شعر کہہ رہا ہوں

مجھے تِرے بعد بھی یہ موسم ہے راس اب تک ذرا ذرا سا

رات کی خاموشی کا ماتھا ٹھنکا تھا

 رات کی خاموشی کا ماتھا ٹھنکا تھا

جانے کس کے ہاتھ کا کنگن کھنکا تھا

جھیل نے اپنے سینے پر یوں ٹانک لیا

جیسے میں آوارہ چاند گگن کا تھا

اس کا لان بہاروں سے آباد رہا

سُوکھ گیا جو پیڑ مِرے آنگن کا تھا

سخن کا اس سے یارا بھی نہیں ہے

 سخن کا اس سے یارا بھی نہیں ہے

سخن کے بِن گزارا بھی نہیں ہے

بیاں شعروں میں ہم کرتے ہیں جتنا

وہ اس درجہ تو پیارا بھی نہیں ہے

بہت شکوے ہیں اس کو زندگی سے

مگر مرنا گوارا بھی نہیں ہے

کہاں بشارت فصل بہار لائی تھی

 کہاں بشارت فصلِ بہار لائی تھی

ہوا تو باغ کی عزت اُتار لائی تھی

گُلوں پہ اُڑتی ہوئی تتلیوں سے یاد آیا

تِری طلب مجھے دریا کے پار لائی تھی

صدا نہ پھر مِرے بے جان جسم سے نکلی

ہوا تو اس کو گُپھا تک پکار لائی تھی

تمہارے خواب کو واروں گا میں عطارد پر

 تمہارے خواب کو واروں گا میں عطارد پر

جب اپنے اشک نتھاروں گا میں عطارد پر

وہاں تھا مارنا تجھ کو جہاں نہ پانی ملے

سو طے کیا تجھے ماروں گا میں عطارد پر

گزر کے آنا پڑے گا زُحَل وغیرہ سے

کبھی جو تجھ کو پکاروں گا میں عطارد پر

سر اٹھایا مذہبی دیوار پر پٹکا ہوا

 سر اٹھایا مذہبی دیوار پر پٹکا ہوا

راہ پر آنے لگا دل راہ سے بھٹکا ہوا

رس کشی کی دعوتیں دیتے رہے تازہ گلاب

جھاڑیوں میں تھا مگر تتلی کا پر اٹکا ہوا

تذکرہ ہونے لگا جب آستیں کے سانپ کا

پاس ہی احساس مجھ کو سرسراہٹ کا ہوا